پی پی 52 ضمنی الیکشن؛ ووٹوں کی گنتی کے دوران پولیس نے آر او آفس کنٹینر لگا کر سیل کردیا

سیالکوٹ ( اُردو پوائنٹ اخبارتازہ ترین۔ 01 جون 2025ء ) پنجاب اسمبلی کے حلقہ پی پی 52 میں ضمنی الیکشن میں پولنگ کے بعد ووٹوں کی گنتی کے دوران پولیس نے آر او آفس کنٹینر لگا کر سیل کردیا۔ تفصیلات کے مطابق راستوں کی بندش کے باوجود پاکستان تحریک انصاف کے کارکنوں کی بڑی تعداد ریٹرننگ افسر کے دفتر کے باہر پہنچ گئی، اس دوران تصادم شروع ہوتا دیکھ کر پی ٹی آئی رہنماء عالیہ حمزہ فوری طور پر کارکنان اور پولیس کے درمیان آ گئیں اور کارکنان کو پیچھے دھکیلنا شروع کر دیا۔

اپنے ایک بیان میں پاکستان تحریک انساف کے رہنماء مونس الٰہی نے کہا کہ آج سمبڑیال حلقہ پی پی 52 ضمنی انتخابات میں پولیس اور انتظامیہ نے مریم گردی کی انتہا کردی، پولیس گاڑیوں میں جعلی ووٹوں کے ڈبے لائے گئے، تحریک انصاف کے ووٹروں اور پولنگ ایجنٹس پر تشدد کیا گیا، پولنگ اسٹیشنز بند کر کے جعلی ٹھپے لگائے گئے، ن لیگی جتھوں نے پولنگ سٹیشنز پر اوپن غنڈہ گردی کی، مینڈیٹ چوروں پر لعنت بھیجتے ہیں۔

(جاری ہے)

اسی حوالے سے پاکستان تحریک انصاف کے ترجمان شیخ وقاص اکرم کا کہنا تھا کہ سیالکوٹ پی پی 52 سمبڑیال میں آج پولنگ کے دن ہمارے امیدوار فاخر نشاط گھمن کے پولنگ ایجنٹس کو پولنگ سٹیشن سے باہر نکال کر پولیس مار پیٹ کر رہی ہے، بہت سی جگہوں پر پولنگ ایجنٹوں کو اینٹوں اور پتھروں سے مارا گیا ہے، پی پی 52 سمبڑیال پولنگ اسٹیشن لوپووالی پنجاب پولیس کی جانب بدترین دھاندلی جاری ہے جہاں پولنگ ایجنٹس کو باہر نکال دیا گیا اور عوام کو تشدد کا نشانہ بنایا گیا۔

انہوں نے بتایا کہ یو سی بدوکی گاؤں رالیوکی اور کھرولیاں میں پولنگ ایجنٹس کو باہر نکال کر اندر ٹھپے لگائے جا رہے ہیں، ضمنی الیکشن کے لیے جاری پولنگ کے دوران 30 سے 35 ڈنڈا بردار مبینہ پولیس والے پولنگ سٹیشن کے اندر گھس گئے اور پی ٹی آئی کے پولنگ ایجنٹ کو دھکے مار کر زبردستی پولنگ سٹیشن سے باہر نکال کر اندر سے تالا لگا دیا، الیکشن چھیننے کی اس کوشش کو خان کے جانثار ہر قیمت پر ناکام بنائیں، سب کو ہی ہدایت کی جاتی ہے کہ ہر چیز الیکشن کمیشن کے سیل یا ان کی ہیلپ لائن پر رپورٹ کریں، اگر فون نہ ملے تو ان کی ویب سائیٹ سے ای میل لے کر ہر واقعے کو رپورٹ کریں، پولیس ہیلپ لائن پر بھی سب رپورٹ کریں تاکہ ریکارڈ رہے، جن دوستوں کی زمہ داری پولنگ کی حفاظت ہے وہ بھی ہمت کریں۔