خاتون ڈرائیور نے بریک کی بجائے ریس دبا دی، کار بینک میں جا گھسی

بہاولپور ( اُردو پوائنٹ اخبارتازہ ترین۔ 15 مئی 2025ء ) صوبہ پنجاب کے جنوبی ضلع بہاولپور میں ایک خاتون ڈرائیور نے تیز رفتار گاڑی بینک میں گھسا دی۔ تفصیلات کے مطابق یہ افسوسناک واقعہ بہاولپور میں پیش آیا جہاں خاتون ڈرائیور کی جانب سے تیز رفتار گاڑی بینک میں گھسا دی گئی، حادثے میں تیز رفتار گاڑی خاتون سے بے قابو ہو کر مسلم کمرشل بینک کے دروازے میں جا لگی۔

ریسکیو 1122 کے اہلکار کا کہنا ہے کہ خاتون نے جلد بازی میں بریک کی بجائے ریس دبا دی تھی، جس کی وجہ سے حادثہ پیش آیا، حادثے میں بینک کے شیشے ٹوٹ گئے، حادثے کی وجہ سے خاتون ڈرائیور معمولی زخمی ہوگئی جب کہ گاڑی کو بھی نقصان پہنچا۔ ادھر کراچی کے علاقے عیسیٰ نگری میں ٹریلر کی گاڑی کو ٹکر لگنے سے گاڑی سوار خاتون ڈرائیور نے اسلحہ نکال کر ہوائی فائرنگ کردی، پولیس نے موقع پر پہنچ کر ٹرک ڈرائیور اور خاتون کو اسلحے سمیت تھانے منتقل کرکے سرکار کی مدعیت میں مقدمہ درج کیا، معاملہ عدالت پہنچا تو حادثے کے بعد مشتعل ہوکر ٹریلر ڈرائیور پر فائرنگ کرنے والی خاتون ڈرائیور کو عدالت نے جیل بھیج دیا۔

(جاری ہے)

مدعی مقدمہ اے ایس آئی شیر احمد کا کہنا تھا کہ علاقہ گشت پر مامور تھا کہ جمعے کی رات ایک بجے کے قریب عیسیٰ نگری کٹ کے قریب ٹریلر اور گاڑی دونوں تیز رفتاری سے گاڑی چلا رہے تھے اور اس دوران ٹریلر نے غفلت و لاپروائی سے آگے نکلنے کی کوشش کی اور اس دوران ٹریلر کی ٹکر سے گاڑی کو نقصان ہوا تو گاڑی سے ایک خاتون اتری اور انھوں نے طیش میں آکر گاڑی کے اندر سے پستول نکال کر ہوائی فائرنگ کردی۔

مدعی نے بتایا کہ اس دوران وہ اپنے دیگر پولیس اہلکاروں کے ہمراہ ٹرک ڈرائیور کو پکڑا جس نے اپنا نام ظفر اقبال بتایا، بعدازاں خاتون جس کا نام علیشہ معلوم ہے اور اس کے قبضے سے ایک نائن ایم ایم پستول برنگ سیاہ لوڈ میگزین 9 زندہ راؤنڈ برآمد ہوا، خاتون سے لائسنس طلب کرنے پر انہوں ںے موقع پر پیش کیا جسے پولیس نے اپنے قبضے میں لے کر دونوں گاڑیوں اور خاتون سمیت ٹرک ڈرائیور کو تھانے منتقل کردیا جہاں ڈرائیور ظفر اقبال کا غفلت و لاپروائی سے گاڑی چلانے کا فعل بجرم دفعات 279 اور 427 جب کہ خاتون علیشہ کا ہوائی فائرنگ کرنے کا فعل زیر دفعہ 337 ایچ ٹو ہونا قرار پایا۔

بتایا گیا کہ پی آئی بی کالونی پولیس نے مقدمہ درج کرکے مزید تفتیش کے لیے انویسٹی گیشن پولیس کے حوالے کر دیا، ایس ایچ او پی آئی بی اشفاق نے بتایا کہ خاتون کے اسلحہ کا لائسنس کوئٹہ سے بنوا ہوا ہے جو کہ گزشتہ سال 2024ء میں ایکسپائر ہوگیا تھا، جس کے بعد انویسٹی گیشن پولیس نے خاتون اور ڈرائیور کو عدالت میں پیش کیا تھا جنھیں جیل بھیج دیا۔