امید ہے امریکی ثالثی کے نتیجے میں مقبوضہ جموں وکشمیر کے دیرینہ تنازعے کا حل نکلے گا ، محمد نثارچوہدری

مقبوضہ جموں وکشمیر کی صورتحال انتہائی نازک ہے پوری دنیا جانتی ہے کہ مقبوضہ جموں وکشمیر اس وقت دنیا کی سب سے بڑی انسانی جیل ہے

جمعرات 15 مئی 2025 17:03

لندن(اُردو پوائنٹ اخبارتازہ ترین - این این آئی۔ 15 مئی2025ء)کنوینئر کشمیر رابطہ کمیٹی اوورسیز پاکستانیز ویلفیئر کونسل یوکے OPWC محمد نثار چوہدری نے امریکی صدر ڈونلڈ ٹرمپ کی طرف سے مسئلہ کشمیر کے حل کے لئے ثالثی کے اعلان کا خیر مقدم کیا ہے اپنے خصوصی بیان میں محمد نثار چوہدری نے امید ظاہر کی ہے کہ امریکی ثالثی کے نتیجے میں مقبوضہ جموں وکشمیر کے دیرینہ تنازعے کا حل نکلے گا اور خطے میں پائیدار امن قائم ہو گا۔

انھوں نے مزید کہا کہ صدر ٹرمپ کا اعلان ثابت کرتا ہے کہ مقبوضہ جموں وکشمیر کا مسئلہ دوطرفہ نہیں بلکہ بین الاقوامی معاملہ ہے اس مسئلے کو عالمی برادری نے حل کرنا ہے چنانچہ اب اقوام متحدہ عالمی برادری کی ذمہ داری ہے کہ وہ اس سلسلے میں آگے آئے اور دیرینہ مسئلہ حل کروائے امریکی صدر ٹرمپ کو بھی پتہ ہے کہ مقبوضہ جموں وکشمیر کی صورتحال انتہائی نازک ہے پوری دنیا جانتی ہے کہ مقبوضہ جموں وکشمیر اس وقت دنیا کی سب سے بڑی انسانی جیل ہے اور قابض بھارتی افواج کشمیریوں پر ظلم وستم کے پہاڑ ڈھا رہی ہے آئے روز خواتین کی عصمت دریاں کی جا رہی ہے اقوام متحدہ سمیت پوری دنیا خاموش تماشائی بنی ہوئی ہے۔

(جاری ہے)

ان کا کہنا تھا کہ امریکہ کو مسئلہ کشمیر کے لئے کردار ادا کرنا چاہیے مسئلہ کشمیر اقوام متحدہ کے ایجنڈے پر دیرینہ حل طلب مسئلہ ہے اور ریاست کی گزشتہ کئی نسلیں کشمیر کی آزادی کے لئے اپنی قربانی دے چکی ہیںجنوبی ایشیا میں پائیدار امن کے قیام کے لئے تنازعہ کشمیر کا پائیدار اور منصفانہ حل انتہائی ضروری ہے۔