کلرسیداں ،گورنمنٹ ہائی سکول میں یوم تشکر کی تقریب، افواجِ پاکستان کو خراجِ تحسین

جمعہ 16 مئی 2025 12:51

کلرسیداں (اُردو پوائنٹ اخبارتازہ ترین - اے پی پی۔ 16 مئی2025ء) گورنمنٹ ہائی سکول کلرسیداں میں یوم تشکر کی تقریب میں افواجِ پاکستان کو خراجِ تحسین پیش کیا گیا۔ تفصیلات کے مطابق پاک بھارت کشیدگی کے دوران افواجِ پاکستان اور پاک فضائیہ کی جانب سے قومی امنگوں کے مطابق دشمن کو دندان شکن جواب دینے پر ملک بھر کی طرح گورنمنٹ ہائی سکول کلرسیداں میں بھی یومِ تشکر بھرپور طریقے سے منایا گیا۔

تقریب کا آغاز پرچم کشائی سے ہوا، جس کے ساتھ ہی طلباء کے فلک شگاف نعرے لگائے۔

(جاری ہے)

حب الوطنی کے جذبے سے سرشار اس تقریب میں طلباء نے ولولہ انگیز ملی نغمے پیش کیے ۔تقریب سے خطاب کرتے ہوئے رئیسِ مدرسہ محمد خالد عباسی نے افواجِ پاکستان کی جرأت، قربانی اور پیشہ ورانہ مہارت کو بھرپور خراجِ تحسین پیش کیا۔ انہوں نے کہا کہ پاک فوج قوم کی امیدوں کا مرکز ہے اور ہر مشکل وقت میں اس نے اپنی شجاعت کا لوہا منوایا ہے۔ انہوں نے طلباء کو مخاطب کرتے ہوئے کہا کہ نئی نسل کو بھی اسی جذبے سے سرشار ہو کر ملکی دفاع اور تعمیر میں کردار ادا کرنا ہوگا۔ تقریب کے اختتام پر ملک و قوم کی سلامتی، ترقی اور استحکام کے لیے خصوصی دعا کی گئی۔\378