امریکی کمپنیوں کی ایران میں سرمایہ کاری پر کوئی اعتراض نہیں، امریکا اقتصادی پابندیاں ختم کرے،ایرانی وزیر خارجہ

جمعہ 16 مئی 2025 13:05

تہران (اُردو پوائنٹ اخبارتازہ ترین - اے پی پی۔ 16 مئی2025ء) ایران کے وزیر خارجہ عباس عراقچی نے کہا ہے کہ امریکی کمپنیوں کی ایران میں سرمایہ کاری پر کوئی اعتراض نہیں، وہ تیل اور گیس جیسے اہم شعبوں میں کام کرنا چاہیں تو بھی راہ ہموار کی جا سکتی ہے، بشرطیکہ امریکا خود عائد کردہ اقتصادی پابندیاں ختم کرے۔العربیہ اردو کے مطابق انہوں نے کہا کہ ہم نے امریکی کمپنیوں کی ایران میں اقتصادی سرگرمیوں پر کوئی پابندی نہیں لگائی، ان کی غیر موجودگی کی اصل وجہ وہ پابندیاں ہیں جو امریکانے خود ہم پر عائد کر رکھی ہیں۔

انہوں نے واضح کیا کہ اصل رکاوٹ وہ سخت اقتصادی پابندیاں ہیں جو امریکی حکومت کی طرف سے ایرانی معیشت اور وہاں سرمایہ کاری کرنے والے افراد و اداروں پر لگائی کی گئی ہیں۔

(جاری ہے)

ایرانی وزیر خارجہ نے کہا کہ اگر امریکی کمپنیاں ایران کی معیشت میں دلچسپی رکھتی ہیں تو انہیں چاہیے کہ امریکا ان پابندیوں کو ختم کرے تاکہ یہ راہ ہموار ہو سکے۔یہ بیان ایک ایسے وقت میں سامنے آیا ہے جب امریکی صدر ڈونلڈ ٹرمپ کی انتظامیہ اور ایران کے درمیان جوہری معاہدے پر ازسر نو مذاکرات کی چار کوششیں ہو چکی ہیں۔

ان مذاکرات کا مقصد 2015کے تاریخی جوہری معاہدے کی جگہ ایک نیا معاہدہ طے کرنا تھا۔ ٹرمپ بارہاایران کو تنبیہ کر چکے ہیں کہ اگر مذاکرات ناکام ہوئے تو وہ عسکری کارروائی کا بھی راستہ اپنا سکتے ہیں۔گزشتہ ہفتوں کے دوران امریکی انتظامیہ نے ایران کی تیل صنعت، میزائل اور جوہری پروگرام سے وابستہ کئی اداروں اور افراد پرپابندیاں بھی عائد کیں۔