موسمیاتی تبدیلیاں پاکستان کیلئے وجودی خطرات میں سے ایک ہیں، گرین سکوک سے حاصل ہونے والے فنڈز کوملک بھرمیں پانی کے منصوبوں کیلئے استعمال میں لایا جا ئے گا، وفاقی وزیرخزانہ

اسلام آباد (اُردو پوائنٹ اخبارتازہ ترین - اے پی پی۔ 16 مئی2025ء) وفاقی وزیرخزانہ ومحصولات سینیٹرمحمداورنگزیب نے کہاہے کہ موسمیاتی تبدیلیاں پاکستان کیلئے وجودی خطرات میں سے ایک ہیں، گرین سکوک سے حاصل ہونے والے فنڈز کوملک بھرمیں پانی کے منصوبوں کیلئے استعمال میں لایا جائے گا، کثیرالجہتی، دوطرفہ شراکت دار اور سرمایہ کار پاکستان میں ٹیکس،توانائی، ایس اوایز،نجکاری، پبلک فنانساور پنشن سمیت مختلف شعبوں میں ڈھانچہ جاتی اصلاحات کا تسلسل چاہتے ہیں۔

جمعہ کوپاکستان کے پہلے ساورن گرین سکوک بانڈز کے اجراء کے موقع پراپنے خطاب میں انہوں نے کہاکہ ابتدائی طورپرگرین سکوک سے 30ارب روپے حاصل کئے جائیں گے، اوریہ پاکستان سٹاک ایکسچینج میں فہرستی حیثیت رکھیں گے، مجموعی قرضوں میں سکوک کاحصہ 14فیصد ہو گیا ہے، اس حوالہ سے ہم ملائشیا کے ماڈل کی پیروی کرنا چاہتے ہیں۔

(جاری ہے)

انہوں نے کہا کہ گرین سکوک سے حاصل ہونے والے فنڈز کوملک بھرمیں پانی کے منصوبوں کیلئے استعمال میں لایا جائیگا، کیونکہ موسمیاتی تبدیلیاں پاکستان کیلئے وجودی خطرات میں سے ایک ہیں۔

وزیرخزانہ نے کہاکہ نجی شعبہ کوملکی معیشت کی قیادت کرنا چاہیے۔ موسمیاتی تبدیلیوں اور کلائمیٹ فنانسنگ میں نجی شعبہ کاکردارکلیدی اہمیت کاحامل ہے۔ انہوں نے کہاکہ ہم بہترین عالمی طریقہ کار کے مطابق ڈیبٹ منیجمنٹ آفس کی ری سٹرکچرنگ اوراسے دوبارہ منظم بنا رہے ہیں۔اس سلسلہ میں مختلف اور متنوع فنڈنگ پراجیکٹ سامنے آئیں گے۔وزیرخزانہ نے کہاکہ پاکستان سٹاک ایکسچینج کو100انڈیکس کے نئے ریکارڈپرمبارکبادپیش کرتے ہیں۔

اس سے ملکی معیشت اورپاکستان کی مسلسل کامیابیوں پرسرمایہ کاروں کے اعتمادکی عکاسی ہورہی ہے، جوملک بھرمیں یوم تشکرکے حوالہ سے پاکستان سٹاک ایکسچینج کابہترین آغازہے۔مجھے یہ یقین ہے کہ پاکستان اورپاکستان سٹاک ایکسچینج دونوں کیلئے مزید اچھی خبریں آئیں گی۔وزیرخزانہ نے کہاکہ واشنگٹن اورلندن میں انہوں نے حال ہی میں کثیرالجہتی، دوطرفہ شراکت داروں اور سرمایہ کاروں سے مسلسل ملاقاتیں کی ہیں۔

ان ملاقاتوں سے ہمیں دوپیغامات ملے ہیں، پہلے یہ کہ کثیرالجہتی، دوطرفہ شراکت دار اور سرمایہ کارپاکستان میں کلی معیشت کے استحکام سے خوش ہیں،انہوں نے پاکستانی معیشت کے استحکام کی رفتاراور نظام الاوقات کی تعریف کی اوراس پرحیرت کا اظہار کیا۔ وزیر خزانہ نے کہاکہ اس پروہ سابق نگران وزیرخزانہ ڈاکٹرشمشادکوکریڈٹ دینا چاہتے ہیں جنہوں نے عبوری دورمیں پاکستانی معیشت کیلئے راستے کاتعین کردیاتھا، ہم مسلسل اسی راہ کی پیروی کررہے ہیں۔

وزیرخزانہ نے کہاکہ کثیرالجہتی، دوطرفہ شراکت دار اور سرمایہ کار پاکستان میں ٹیکس،توانائی، ایس اوایز،نجکاری، پبلک فنانس اور پنشن سمیت مختلف شعبوں میں ڈھانچہ جاتی اصلاحات کا تسلسل چاہتے ہیں۔ وزیرخزانہ نے کہاکہ آنے والے مالی سال کے وفاقی بجٹ کی تیاریاں جاری ہے اوراس ضمن میں مختلف شراکت داروں کے ساتھ مشاورت اوربات چیت ہورہی ہے۔ہمیں اس حوالہ سے فروری سے تجاویز موصول ہورہی ہیں، انہوں نے کہاکہ ہم چاہتے ہیں کہ وفاقی بجٹ پاکستان کیلئے ہوم گرائون اقتصادی ایجنڈا پرمبنی پاکستانی معیشت کے تزویراتی سمت کاعکاس ہو۔وزیرخزانہ نے گرین سکوک کے اجراء میں تعاون فراہم کرنے والے بینکوں کاشکریہ بھی اداکیا۔