آپریشن بنیان المرصوص کی کامیابی پر جامعہ کشمیر میں عظیم الشان تقریبات

مظفرآباد (اُردو پوائنٹ اخبارتازہ ترین - این این آئی۔ 16 مئی2025ء) آزاد جموں و کشمیر یونیورسٹی مظفرآباد میں بھارتی جارحیت کے منہ توڑ جواب اور پاک فوج کے کامیاب جوابی آپریشن ’’بنیان المرصوص‘‘کے اعزاز میں یوم تشکر کی تقریبات نہایت تزک و احتشام سے منائی گئیں۔ مرکزی تقریب جامعہ کے سٹی کیمپس میں منعقد ہوئی، جس میں یونیورسٹی کے اساتذہ، افسران، طلبہ و طالبات کے علاوہ شہر کے مختلف کالجز کے اساتذہ، طلبہ، طالبات اور غیر تدریسی عملے نے بھرپور شرکت کی۔

پوسٹ گریجویٹ کالج (بوائز) مظفرآباد، فاطمہ جناح پوسٹ گریجویٹ کالج (خواتین) مظفرآباد، اور اسکالرز کالج مظفرآباد کے طلبہ، اساتذہ اور انتظامی عملے نے جامعہ کشمیر کے اشتراک سے منعقدہ اس یوم تشکر کی تقریب میں اپنے جذبہ حب الوطنی کا والہانہ اظہار کیا۔

(جاری ہے)

مرکزی تقریب سے خطاب کرتے ہوئے وائس چانسلر پروفیسر ڈاکٹر ندیم حیدر بخاری نے پوری قوم اور بہادر مسلح افواج کو اس تاریخی کامیابی پر دلی مبارکباد پیش کی اور کہا کہ اللہ تعالیٰ کی مدد اور افواج پاکستان کی جرات و بہادری نے دشمن کے غرور کو خاک میں ملا دیا۔

اُنہوں نے کہا کہ فتح میزائل کا بروقت اور مؤثر استعمال براہموس میزائل جیسے ہتھیار کا راستہ روکنے کا منہ بولتا ثبوت ہے کہ پاکستان کا دفاع مضبوط ہاتھوں میں ہے۔انہوں نے کہا کہ بھارت کو نہ صرف عسکری میدان میں شرمندگی کا سامنا کرنا پڑا بلکہ سفارتی محاذ پر بھی پسپائی اختیار کرنا پڑی اور یہ وقت زیادہ دور نہیں جب بین الاقوامی سرمایہ کار بھی ہندوستان سے منہ موڑ لیں گے۔

ناظم تعلیمات کالجز ڈاکٹر خواجہ عبدالرحمان نے جامعہ کشمیر کو اس قومی سطح کے یوم تشکر کے انعقاد پر خراجِ تحسین پیش کرتے ہوئے کہا کہ پاک فوج نے اپنے سے کئی گنا بڑے دشمن کو ایسی عبرتناک شکست دی ہے کہ آج بھارت عالمی برادری میں رسوائی کا سامنا کر رہا ہے۔پرنسپل پوسٹ گریجویٹ کالج (بوائز) ڈاکٹر نذر حسین نے کہا کہ دشمن نے رات کی تاریکی میں نہتے عوام کو نشانہ بنانے کی جو بزدلانہ کوشش کی، افواج پاکستان نے اس کا مردانہ وار جواب دے کر دنیا پر واضح کر دیا کہ ہم پر حملے کا ہر وار ناکام بنا سکتے ہیں۔

فاطمہ جناح پوسٹ گریجویٹ کالج (خواتین) کی فیکلٹی اور طالبات نے اس موقع پر ملی نغمے پیش کیے جنہوں نے تقریب کے ماحول کو حب الوطنی کے جذبے سے بھر دیا، جبکہ اسکالرز فاؤنڈیشن کے چیئرمین سید افتخار حسین کاظمی نے اپنے خطاب میں کہا کہ افواج پاکستان نے دشمن کو وہ سبق سکھایا ہے جو تاریخ کا حصہ بن چکا ہے، اور بھارت آئندہ پاکستان کی طرف میلی آنکھ اٹھانے کی جرات نہیں کرے گا۔

تقریب کی نظامت ایڈیشنل رجسٹرار سردار ظفر اقبال نے انجام دی۔ تقریب کے اختتام پر شرکاء نے ایک عظیم الشان ریلی نکالی جو سٹی کیمپس سے شروع ہو کر لال چوک اپر اڈہ تک پہنچی اور ایک بڑے عوامی اجتماع کی شکل اختیار کر گئی۔ اس موقع پر ملک کی سلامتی، استحکام اور افواج پاکستان کی سربلندی کے لیے خصوصی دعا کی گئی، جبکہ شرکاء نے پاکستان اور افواج پاکستان کے حق میں فلک شگاف نعرے لگائے اور بھارتی جارحیت کے خلاف شدید غم و غصے کا اظہار کیا۔