ممبر بلوچستان اسمبلی حاجی برکت علی رند کا یونیورسٹی آف تربت کے لیے سولر واٹر سپلائی سکیم کا اعلان

جمعہ 16 مئی 2025 21:31

تربت (اُردو پوائنٹ اخبارتازہ ترین - این این آئی۔ 16 مئی2025ء) بلوچستان اسمبلی کے رکن اور حلقہ پی بی-27 کیچ سے منتخب نمائندہ حاجی برکت علی رند نے یونیورسٹی آف تربت کیلئے سولرواٹر سپلائی سکیم کا اعلان کیا ہے۔

(جاری ہے)

انہوں نے یہ اعلان یونیورسٹی آف تربت کے وائس چانسلر پروفیسر ڈاکٹر گل حسن سے بروز جمعہ ملاقات کے دوران کیا-اس موقع پر گفتگو کرتے ہوئے ایم پی اے حاجی برکت علی رند نے کہا کہ اس اسکیم کی تکمیل سے یونیورسٹی کے طلبہ، اساتذہ اور عملے سمیت کیمپس کے سبزہ زار، درختوں اور پودوں کے لیے پانی کی دستیابی کو بہتر بنانے میں مدد ملے گی۔

پروفیسر ڈاکٹر گل حسن نے اس اہم اقدام پر ایم پی اے حاجی برکت علی رند کا تہہ دل سے شکریہ ادا کرتے ہوئے کہا کہ یہ اسکیم طلبہ اور عملے کی فلاح و بہبود کے ساتھ ساتھ تربت یونیورسٹی کے سرسبز ماحول کو برقرار رکھنے میں کلیدی کردار ادا کرے گی۔ انہوں نے کہا کہ ہم حاجی برکت رند کے شکر گزار ہیں کہ انہوں نے یونیورسٹی آف تربت کی ترقی اور طلبہ کو سہولیات فراہم کرنے کے لیے گہری دلچسپی کا مظاہرہ کیاہے۔ ان کا یہ اقدام قابل تحسین ہے۔