Live Updates

وفاقی وزیر خزانہ کا پاکستان کے پہلے گرین سکوک بانڈ کے اجرا کا باقاعدہ اعلان ، پاکستان اسٹاک ایکسچینج کو اس تاریخی کامیابی پر مبارکباد

جمعہ 16 مئی 2025 21:45

کراچی (اُردو پوائنٹ اخبارتازہ ترین - آن لائن۔ 16 مئی2025ء) وفاقی وزیر خزانہ محمد اورنگزیب نے پاکستان کے پہلے گرین سکوک بانڈ کے اجرا کا باقاعدہ اعلان کرتے ہوئے پاکستان اسٹاک ایکسچینج کو اس تاریخی کامیابی پر مبارکباد دی اور اسے قابل فخر لمحہ قرار دیا۔ ایک اہم تقریب سے خطاب کرتے ہوئے انہوں نے کہا کہ گرین سکوک بانڈ مکمل شریعہ کمپلائنس کے تحت جاری کیا گیا ہے، جس کا مقصد ماحولیاتی فلاح، پائیدار ترقی اور معیشت کی بہتری کو یکجا کرنا ہے۔

ان کا کہنا تھا کہ ڈومیسٹک گرین سکوک بانڈ سے فنانسنگ کے نئے دروازے کھلیں گے، جبکہ ویلیو بیسڈ اور اسلامک فنانس کو فروغ دینا وقت کی اہم ضرورت ہے۔ انہوں نے بتایا کہ واشنگٹن اور لندن میں سرمایہ کاروں سے کامیاب ملاقاتیں ہوئیں اور عالمی سرمایہ کار پاکستان کے مائیکرو اکنامک استحکام سے مطمئن نظر آتے ہیں۔

(جاری ہے)

انہوں نے مزید کہا کہ پاکستان کے لیے ماحولیاتی تبدیلی ایک حقیقی خطرہ بن چکی ہے، جس سے نمٹنے کے لیے فنانسنگ کا فریم ورک تیار کیا جا رہا ہے۔

ہمیں ملائیشیا کے ماڈل کو اپنانا ہوگا تاکہ ہم بھی اسلامک فنانس کے ذریعے ترقی کی راہ پر گامزن ہو سکیں۔ انہوں نے بتایا کہ آئندہ بجٹ پر کام جاری ہے اور اس حوالے سے اسٹیک ہولڈرز سے مشاورت کی جا رہی ہے، جو اپنی تجاویز حکومت کو پیش کر رہے ہیں۔