پاکستان نیوکلیئربلیک میلنگ نہیں کررہا، جوہری صلاحیت دفاع کیلئے ہے، خواجہ آصف

جمعہ 15 اگست 2025 17:54

اسلام آباد (اُردو پوائنٹ اخبارتازہ ترین - این این آئی۔ 15 اگست2025ء)وزیر دفاع خواجہ محمد آصف نے کہا ہے کہ پاکستان نیوکلیئر بلیک میلنگ کررہا ہے اور نہ اس پر یقین رکھتا ہے، جوہری صلاحیت دفاع کے لیے ہے، مودی اپنے بیانات سے گھر میں اٹھا طوفان روکنے کی کوشش کر رہا ہے۔وزیر دفاع خواجہ آصف نے ایک انٹرویو میں کہا کہ پاکستان میں بی ایل اے اور طالبان بھارت کی پراکسیز ہیں، پاکستان کا بھارت کے اندرونی معاملات سے کوئی تعلق نہیں، پاکستان نے اپنے دفاع میں جنگ لڑی اور کامیابی حاصل کی۔

(جاری ہے)

وزیر دفاع خواجہ آصف نے کہا کہ نریندر مودی کے لیے پاکستان سے جنگ ایک ڈراؤنا خواب بن گئی ہے، مودی کو خواب میں بھی پاکستان اور پاک فوج نظر آتی ہیں، بھارت میں مودی کے خلاف آوازیں اٹھ رہی ہیں، مودی پر کانگریس، چھوٹی ریاستوں کے عوام بھی تنقید کر رہے ہیں۔انہوں نے کہا کہ پاکستان نیوکلیئر بلیک میلنگ کر رہا ہے نہ اس پر یقین رکھتا ہے، پاکستان کی ایٹمی صلاحیت دفاع کے لیے ہے، مودی اپنے بیانات سے گھر میں اٹھا طوفان روکنے کی کوشش کررہا ہے، پاکستان کے جوہری اثاثے محفوظ ہاتھوں میں ہیں جبکہ نریندر مودی کے ہاتھوں بھارت اپنا مقام کھو چکا ہے۔