یومِ تشکر‘ بین الاقوامی اسلامی یونیورسٹی کے کیمپسز میں پرچم کشائی کی تقاریب

خواتین کیمپس میں انچارج ڈاکٹر آمنہ محمود نے قومی پرچم لہرایا‘بڑی تعدادمیں طالبات موجود،فوج کے حق میں نعرے

جمعہ 16 مئی 2025 21:58

اسلام آباد(اُردو پوائنٹ اخبارتازہ ترین - آن لائن۔ 16 مئی2025ء) بین الاقوامی اسلامی یونیورسٹی میں یومِ تشکر کے موقع پر پاکستان کی مسلح افواج کی کامیابیوں کے اعتراف میں میل اور فی میل کیمپسز میں علیحدہ علیحدہ پرچم کشائی کی تقریبات منعقد ہوئیں۔میل کیمپس میں جامعہ کے صدر ڈاکٹر احمد شجاع سید نے قومی پرچم لہرایا۔ اس موقع پر جامعہ کے سیکیورٹی گارڈز کے دستے نے سلامی پیش کی۔

صدر جامعہ ڈاکٹر احمد شجاع سید نے خطاب کرتے ہوئے کہا کہ وطن سے محبت ہمارے دلوں میں رچی بسی ہے، اور ہماری افواج کی کامیابیاں ایک مثال ہیں۔ انہوں نے کہا کہ پاکستان نے ہر محاذ پر دشمن کو پسپا کیا ہے، چاہے وہ زمینی ہو، خلائی یا سائبر، ہماری افواج نے ہر جگہ فتح حاصل کی۔ آج واقعی اس ذات کے حضور تشکر کا دن ہے جس نے اس ارض پاک کو وقار اور فتح بخشی۔

(جاری ہے)

تقریب میں ڈین کلیہ شریعہ و قانون ڈاکٹر محمد ضیاء الحق، ڈین کلیہ عربی ڈاکٹر فضل اللہ، طلبہ کے مشیر ڈاکٹر حافظ غفران اور طلبا کی بڑی تعداد موجود تھی۔ انہوں نے شہداء اور مسلح افواج کو زبردست خراجِ تحسین پیش کیا۔خواتین کیمپس میں انچارج ڈاکٹر آمنہ محمود نے قومی پرچم لہرایا۔ اس موقع پر طالبات کی مشیر ڈاکٹر رخسانہ طارق، دیگر جامعہ حکام اور بڑی تعداد میں طالبات بھی موجود تھیں۔ تقریب میں جوش و خروش دیدنی تھا اور پاکستان کی مسلح افواج کے حق میں نعرے بلند کیے گئے۔یوم تشکر کے موقع پر یونیورسٹی کی فضاء حب الوطنی اور یکجہتی سے بھرپور رہی، جہاں طلباء، اساتذہ اور افسران نے ملک کے دفاع میں قربانیاں دینے والوں کو بھرپور انداز میں خراجِ عقیدت پیش کیا۔