چیئرمین سی ڈی نے آپریشن بنیان مرصوص کی کامیابی پر شاہ فیصل مسجد میں نماز جمعہ ادا کی اوریوم تشکر کی تقریب میں شرکت کی

اسلام آباد (اُردو پوائنٹ اخبارتازہ ترین - اے پی پی۔ 16 مئی2025ء) وزیر اعظم پاکستان کی ہدایت پر جمعہ کو ملک بھر میں یوم تشکر منایا گیا۔ چیئرمین سی ڈی اے محمد علی رندھاوا نے آپریشن بنیان مرصوص کی تاریخی کامیابی اور شہداء کی عظیم قربانیوں کو خراج عقیدت پیش کرنے شاہ فیصل مسجد میں نماز جمعہ ادا کی اوریوم تشکر کی مناسبت سے منعقدہ دعائیہ تقریب میں شرکت کی۔

فیصل مسجد کے امام نے ملک کی ترقی، خوشحالی، استحکام اور پاکستان کی مسلح افواج کی بھارت کے خلاف شاندار کامیابی پر ان کی بہادری، جرات اور مہارت کو سراہا اورشہداء کے بلند درجات کیلئے خصوصی دعا کی ۔ یوم تشکر منانے کا مقصد پاکستان کی عظیم کامیابی پر اللہ کا شکر ادا کرنا، پاکستانی عوام بالخصوص افواج کی قربانیوں کو خراج تحسین پیش کرنا اور ملک میں امن، استحکام اور ترقی کیلئے ان کی کاوشوں کو ہمیشہ یاد رکھنا ہے۔

(جاری ہے)

چیئرمین سی ڈی اے، چیف کمشنر اسلام آباد اور ڈی جی سول ڈیفنس محمد علی رندھاوا نے اس حوالے سے کہا کہ آپریشن بنیان مرصوص پاکستانی افواج کی تاریخ کا ایک سنہرا باب ہے۔ہمارے بہادر جوانوں نے نہ صرف دشمن کو منہ توڑ جواب دیا جس کی تعریف پوری دنیا کر رہی ہے ۔پاکستانی مسلح افواج اپنے ملک کا نہ صرف کامیابی سے دفاع کرنا جانتی ہیں بلکہ وہ دشمن کے ہر وار کو ناکام بنانے کے لیے سیسہ پلائی ہوئی دیوار کی طرح مضبوط اور ناقابل تسخیر ہیں ۔

جب بھارت نے جارحیت کی تو پاک فوج نے اپنی پیشہ ورانہ مہارت اور بہادری سے دشمن کو ناکوں چنے چبوا دئیے۔ انہوں نے کہا کہ یوم تشکر کا مقصد اسی عظیم فتح کے موقع پر اپنی مسلح افواج کو خراج تحسین پیش کرنا، شہداء کی لازوال قربانیوں کو یاد کرنا اور اللہ تعالیٰ کا شکر ادا کرنا ہے کہ اس نے ہمیں ایک مضبوط اور نڈر فوج عطا کی۔ چیئرمین سی ڈی اے، چیف کمشنر اسلام آباد اور ڈی جی سول ڈیفنس محمد علی رندھاوا نےکہا کہ آپریشن بنیان مرصوص کی کامیابی یہ پیغام دیتی ہے کہ پاکستان اپنی خودمختاری اور سلامتی کے حوالے سے کسی قسم کا سمجھو تہ نہیں کرے گا بلکہ دشمن کو عبرت ناک شکست دے گا۔

محمد علی رندھاوا نے کہا کہ یوم تشکر کا دن ہر سال منایا جائے گا تاکہ قوم اپنی مسلح افواج کی بہادر ی ، جرات اور فتح کو خراج تحسین پیش کرنے کے علاوہ ہر سال ان کی قربانیوں کو یاد کرنے کے علاوہ جنت میں اللہ تعالی ان کے درجات کو بلند کرے ، اس کے علاوہ اللہ کا شکر بجا لانے اور ملک و قوم کی سلامتی کیلئے عہد وفا کو دہرانے کا دن ہے۔ ہمیں فخر ہے کہ ہماری افواج نے ہر مشکل گھڑی میں پاکستان کا سر فخر سے بلند کیا ہے۔

انہوں نے کہا کہ آئیے اس دن کو پورے جوش و جذبے سے منائیں اور اپنے شہداء کو خراج عقیدت پیش کریں ۔انھوں نے کہا کہ افواج پاکستان سے یکجہتی اور اظہار محبت کے حوالے سے ملک بھر میں قومی جوش و جذبے کے ساتھ یوم تشکر منایا جارہا ہے۔ محمد علی رندھاوا نے کہا کہ ہمیں اپنی نئی نسل کو بتانا چاہئے کہ ہم نے پاکستان کتنی قربانیوں سے حاصل کیا ہے اور یہ ہمارا فرض ہے کہ ہم اپنی آنے والی نسلوں کو بتائیں کہ پاکستان جب حاصل کیا گیا تو اس کے لئے کتنی قربانیاں دی گئیں۔

انہوں نے کہا کہ ہماری اللہ تعالیٰ سے دعا ہے کہ ہمارا تن، من، دھن اپنے وطن کی خاطر قربان ہو۔ ہم اپنی افواج پاکستان کے ساتھ سیسہ پلائی دیوار کی طرح کھڑے ہیں اور جب بھی ضرورت پڑی تو کسی بھی قربانی سے پیچھے نہیں ہٹیں گے اور دشمن کو پہلے سے بھی زیادہ موثر انداز میں شکست دیں گے۔