سی ڈی اے اور نسٹ کے درمیان ایم او یو کے تحت شفاف اور میرٹ پر مبنی بھرتیوں کیلئے کمیوٹر بیسڈ امتحان کا آغاز

اسلام آباد (اُردو پوائنٹ اخبارتازہ ترین - اے پی پی۔ 17 مئی2025ء) چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفنس محمد علی رندھاوا کی ہدایت پر سی ڈی اے اور نیشنل یونیورسٹی آف سائنس اینڈ ٹیکنالوجی (نسٹ) کے درمیان طے پانے والے مفاہمتی یادداشت (ایم او یو) کے تحت سی ڈی اے میں مختلف شعبہ جات کیلئے میرٹ پر مبنی شفاف بھرتیوں کا سلسلہ شروع ہوچکا ہے، جو 19 مئی تک جاری رہے گا ۔

اس سلسلہ میں چیئرمین سی ڈی اے محمد علی رندھاوا نے نسٹ میں جاری کمپیوٹر بیسڈ امتحانی مرکز کا دورہ کیااور امتحانی انتظامات کا تفصیلی جائزہ لیا۔ اس موقع پر ممبر ایڈمن، ممبر اسٹیٹ، ڈی جی ہیومن ریسورس ڈویلپمنٹ ، ڈی جی ریسورس سمیت دیگر متعلقہ افسران بھی انکے ہمراہ تھے۔ہفتہ کو سی ڈی اے سے جاری بیان کے مطابق چیئرمین سی ڈی اے محمد علی رندھاوا نے کہا کہ سی ڈی اے کی انتظامیہ کا عزم ہے کہ بھرتیوں کا عمل مکمل طور پر شفاف، میرٹ اور جدید ٹیکنالوجی کے ذریعے انجام دیا جائے۔

(جاری ہے)

اس سلسلے میں نسٹ کے ساتھ معاہدہ ایک اہم قدم تھا جسکے تحت امیدواروں کی اہلیت کا اندازہ اور ریکروٹمنٹ کمپیوٹرائزڈ ٹیسٹ کے ذریعے کی جا رہی ہے۔ یہ نظام سفارشات کے کلچر کو ختم کرکے صرف اور صرف میرٹ اور قابلیت کو ترجیح دے گا۔ محمد علی رندھاوا نے کہا کہ سی ڈی اے کو تعلیم یافتہ، ہنر مند اور جدید ٹیکنالوجی سے آگاہ افراد کی ضرورت ہے اور یہ ٹیسٹ سسٹم اس امر کو یقینی بنائے گا کہ ادارے کو بہترین افرادی قوت میسر آئے گی۔

سی ڈی اے اور نسٹ کے درمیان ہونے والے معاہدے کے تحت تمام امتحانات کمپیوٹر بیسڈ طریقے سے لئے جائیں گے، جنکی نگرانی اور رزلٹ کی تیاری کا عمل مکمل طور پر خودکار اور شفاف ہوگا۔ اس سسٹم کے ذریعے امیدواروں کی درخواستوں کی سکریننگ سے لے کر فائنل سلیکشن تک تمام مراحل میں کسی قسم کی انسانی مداخلت کے بغیر میرٹ کو یقینی بنایا جائے گا۔ سہہ روزہ ٹیسٹ کا سلسلہ 17 مئی تا 19 مئی تک نسٹ یونیورسٹی میں جاری رہے گا جس میں تقریباً 3823 امیدوار ٹیسٹ میں حصہ لیں گے۔

کل تین سیشنز منعقد کئے جارہے ہیں، جن میں سے ہر سیشن میں 485 امیدواروں کے ٹیسٹ دینےکی گنجائش ہے۔ آج کے روز پہلے سیشن میں 297 امیدواروں نے شرکت کی جبکہ دوسرے سیشن میں 312 امیدوار موجود تھے۔ اسی طرح تیسرے اور آخری سیشن میں بھی امیدواروں کی بڑی تعداد کی شرکت متوقع ہے۔ یہ ٹیسٹ سی ڈی اے اور نسٹ کے درمیان طے پانے والے معاہدے کے تحت منعقد کیے جارہے ہیں، جن کا مقصد شفافیت اور میرٹ پر مبنی بھرتیوں کا عمل یقینی بنانا ہے۔

چیئرمین سی ڈی اے نے امتحانی مرکز کے دورے کے دوران امتحانی عملے سے ٹیسٹ کی شفافیت کے بارے میں گفتگو کی اور نسٹ کے ریکروٹمنٹ کے معیار کو سراہا ۔ انہوں نے زور دیا کہ امتحانی مراکز پر تمام ضروری انتظامات مکمل طور پر شفاف اور بہترین ہونے چاہئیں تاکہ ہر امیدوار کو یکساں مواقع میسر آسکیں۔انہوں نے کہا کہ سی ڈی اے اور نسٹ کا یہ تعاون مستقبل میں بھی جاری رہے گا اور ادارے کی کارکردگی کو بہتر بنانے کیلئے جدید تحقیق اور تربیتی پروگرامز سے فائدہ اٹھایا جائے گا۔

انہوں نے امید ظاہر کی کہ اس شراکت داری سے نہ صرف سی ڈی اے کو باصلاحیت افراد میسر آئیں گے بلکہ ملکی ترقی میں بھی مثبت کردار ادا کیا جاسکے گا۔اس موقع پر نسٹ یونیورسٹی کی انتظامیہ نے سی ڈی اے کو یقین دلایا کہ وہ مکمل شفافیت اور میرٹ کے اصولوں پر عملدرآمد کرتے ہوئے بھرتیوں کے عمل کو کامیاب بنائیں گے۔ انہوں نے کہا کہ نسٹ کا جدید امتحانی نظام یقینی بنائے گا کہ صرف قابل ترین افراد ہی سی ڈی اے کا حصہ بنیں اور ادارے اور ملک کی تعمیر و ترقی میں اپنا کلیدی کردار ادا کریں۔