خیبرپختونخوا حکومت کا سولر پینل منصوبہ کرپشن و کمیشن مافیا کی نذر ہوگیا،عظمی بخاری

اتوار 18 مئی 2025 15:50

لاہور (اُردو پوائنٹ اخبارتازہ ترین - اے پی پی۔ 18 مئی2025ء) وزیر اطلاعات پنجاب عظمی بخاری نے کہا ہے کہ خیبرپختونخوا حکومت کا سولر پینل منصوبہ کرپشن اور کمیشن مافیا کی نذر ہوگیا،کے پی حکومت کی تمام کارکردگی صرف بیانات اور بھڑکوں تک محدود ہے۔اتوار کے روز جاری اپنے ایک بیان میں انہوں نے کہا کہ خیبرپختونخوا حکومت کا اربوں روپے کا سولر پینل منصوبہ کرپشن اور کمیشن مافیا کی نذر ہوگیا ہے،8 ماہ قبل وزیر اعلی علی امین گنڈاپور نے صوبے میں سولر پینل منصوبے کا اعلان کیا، جس کے پی سی ون کی منظوری سے قبل ہی ٹینڈر جاری کردیئے گئے،کے پی حکومت کا سولر پینل منصوبہ مبینہ طور پر دو ارب روپے کی کمیشن کی نذر ہوا ہے۔

عظمی بخاری نے کہا کہ خیبرپختونخوا میں کوئی عوامی مفاد کا منصوبہ بنتا ہی نہیں، صوبے کے عوام کا پیسہ صرف احتجاجی تحریکوں اور پی ٹی آ ئی کے جلسے جلوسوں پر خرچ ہو رہا ہے جبکہ عوام اپنے بنیادی مسائل کے حل کیلئے در در کی ٹھوکریں کھا رہے ہیں ،تبدیلی اورسونامی جیسے شگوفوں نے پختونوں کو ناقابل تلافی نقصان پہنچایا ہے۔

(جاری ہے)

انہوں نے کہا کہ کے پی حکومت کی تمام تر کارکردگی صرف بیانات اور بھڑکوں تک محدود ہے،علی امین گنڈاپور نے عوام کی فلاح کیلئے کوئی منصوبہ شروع نہیں کیا ،پی ٹی آ ئی کی کے پی کے میں تیرہ سالہ حکومت کے دوران ایک بھی نیا ہسپتال یا تعلیمی ادارہ نہیں بنا۔

وزیر اطلاعات نے مزید کہا کہ کے پی حکومت کو دیئے تمام فنڈز کا وفاق پہلے آڈٹ کروائے،جب تک کے پی حکومت پچھلے فنڈز کا حساب نہیں دیتی ،وفاق انکو مزید ایک دھیلہ نہ دے،صوبے کی عوام پر خرچ ہونے والا پیسہ کمیشن مافیا اور من پسند ٹھیکیداروں کی جیبوں میں جارہا ہے۔