پی ایس ایل 10،ملتان سلطانز کو آخری میچ میں کوئٹہ گلیڈی ایٹرز نے 2 وکٹوں سے ہرادیا

راولپنڈی(اُردو پوائنٹ اخبارتازہ ترین - این این آئی۔ 18 مئی2025ء) ملتان سلطانز ایچ بی ایل پی ایس ایل 10کا اختتام جیت پر نہ کرسکی اور اسے اپنے آخری میچ میں کوئٹہ گلیڈی ایٹرز کے خلاف 2وکٹوں سے شکست کا سامنا کرنا پڑا،اس جیت کے ساتھ کوئٹہ گلیڈی ایٹرزنے 15پوائنٹس کے ساتھ ٹیبل پر پہلی پوزیشن حاصل کرلی ،ملتان سلطانز جس نے گزشتہ چار فائنلز کھیلنے کے علاوہ 2021میں ٹائٹل بھی جیتا تھا اس سیزن میں 10میں سے صرف ایک میچ جیتنے میں کامیاب ہوسکی۔

اتوار کو راولپنڈی کرکٹ اسٹیڈیم میں ملتان سلطانز نے ٹاس جیت کر پہلے بیٹنگ کا فیصلہ کیا۔ملتان سلطانز دو غیرملکی کھلاڑیوں دلشن مادوشانکا اور پیٹر ہیٹزوگلو کے ساتھ میدان میں اتری جبکہ اس کے ڈیولپمنٹ اسکواڈ کے دو کھلاڑیوں جہانزیب سلطان اور ہمایوں الطاف کو بھی اس بڑے پلیٹ فارم پر کھیلنے کا موقع فراہم کیا گیا۔

(جاری ہے)

ملتان سلطانز نے 20اوورز میں7وکٹوں پر185رنز بنائے۔

کوئٹہ گلیڈی ایٹرز نے 186رنز کا ہدف میچ کی آخری گیند پر آٹھ وکٹوں کے نقصان پر حاصل کرلیا۔ملتان سلطانز کو ابتدا میں ہی کپتان محمد رضوان کی وکٹ کا نقصان اٹھانا پڑا جو 4رنز بناکر فہیم اشرف کی گیند پر بولڈ ہوگئے جس کے بعد یاسرخان اور پی ایس ایل میں اپنا پہلا میچ کھیلنے والے جہانزیب سلطان نے دوسری وکٹ کی شراکت میں 52 رنز کا اضافہ کیا۔ جہانزیب نے ایک چھکے اور دو چوکوں کی مدد سی25 رنز بنائے۔

یاسرخان نے 45رنز کی اننگز کھیلی جس میں6 چوکے اور2 چھکے شامل تھے۔ان دونوں کو عثمان طارق نے آؤٹ کیا جنہوں نے اننگز میں تیسری کامیابی2 چوکوں اور 3 چھکوں کی مدد سے 36 رنز بنانے والے طیب طاہر کو آٹ کرکے حاصل کی۔عامر برکی، ہمایوں الطاف اور شاہد عزیز کے بالترتیب 21 ،16اور29رنز کی وجہ سے ملتان سلطانز 185رنز تک پہنچنے میں کامیاب ہوسکی۔عامر برکی اور شاہد عزیز نے ساتویں وکٹ کی شراکت میں قیمتی 35 رنز کا اضافہ کیا۔

کپتان سعود شکیل اور خواجہ نافع نیکوئٹہ گلیڈی ایٹرز کو 77 رنز کا پراعتماد آغاز فراہم کیا۔ خواجہ نافع4 چھکوں اور5 چوکوں کی مدد سی51 رنز بناکر شاہد عزیز کی گیند پر بولڈ ہوئے ۔ اوشکا فرنینڈو بھی شاہد عزیز کی گیند پر7 رنز بناکر آؤٹ ہوئے۔ سعود شکیل کی 18 رنز کی اننگز کا خاتمہ حسنین نے کیا۔ ملتان سلطانز نے صرف دس رنز کے اضافے پر تین وکٹیں حاصل کرکے اپنی گرفت مضبوط کرنے کی کوشش کی اور جب عبید شاہ نے دنیش چندی مل کو 17 رنز پر آٹ کیا تو کوئٹہ گلیڈی ایٹرز کا اسکور 4 وکٹوں پر116رنز تھا جو پیٹر ہیٹزوگلو نے دانش عزیز کو صفر پر بولڈ کیا تو کوئٹہ گلیڈی ایٹرز 123رنز 5 کھلاڑی آؤٹ پر مشکلات میں نظر آنے لگی تھی۔

حسن نواز اور فہیم اشرف کی36رنز کی پارٹنرشپ شاہد عزیز نے فہیم اشرف کو 16 رنز پر آؤٹ کرکے ختم کی۔اسی اوور میں وسیم جونیئر بھی رن آٹ ہوئے۔شاہدعزیز نی29 رنز دے کر 3 وکٹیں حاصل کیں۔کوئٹہ گلیڈی ایٹرز کو آخری اوور میں جیت کے لیے 11رنز درکار تھے اور اس کی آخری امید حسن نواز تھے جنہوں نے حسنین کی آخری گیند پر چھکا مارکر اپنی ٹیم کو کامیابی دلادی۔ انہوں نے 38 گیندوں پر 6 چھکوں اور 2 چوکوں کی مدد سے 67 رنز بنائے اور آؤٹ نہیں ہوئے۔