صوبائی حکومت وزیر اعلیٰ بلوچستان کی قیادت میں صوبے کی ہمہ جہت ترقی کیلئے سنجیدہ اقدامات کر رہی ہے،مشیر برائے کھیل

اتوار 18 مئی 2025 20:45

تربت (اُردو پوائنٹ اخبارتازہ ترین - این این آئی۔ 18 مئی2025ء) وزیر اعلیٰ بلوچستان کی مشیر برائے کھیل و امورِ نوجوانان مینا مجید بلوچ نے کہا ہے کہ موجودہ صوبائی حکومت وزیر اعلیٰ بلوچستان میر سرفراز بگٹی کی قیادت میں صوبے کی ہمہ جہت ترقی کے لیے سنجیدہ اقدامات کر رہی ہے۔ انہوں نے کہا کہ تمام اضلاع میں یکساں طور پر مختلف ترقیاتی منصوبوں پر تیزی سے کام جاری ہے جن میں عوامی فلاح و بہبود کو ترجیح دی جا رہی ہے یہ بات انہوں نے تربت میں میڈیا نمائندگان سے گفتگو کرتے ہوئے کہی۔

مشیر کھیل و امورِ نوجوانان نے کہا کہ حکومت کی ترجیحات میں صحت، تعلیم، نوجوانوں کو باوقار روزگار کی فراہمی، خواتین کے مسائل کا حل اور بنیادی ضروریاتِ زندگی کی فراہمی شامل ہے، اور ان شعبوں میں متعدد منصوبوں پر عملی طور پر کام کا آغاز ہو چکا ہے۔

(جاری ہے)

انہوں نے بتایا کہ ضلع کیچ کے مختلف علاقوں، بالخصوص سب تحصیل مند میں صحت، تعلیم، صاف پانی کی فراہمی، خواتین کے لیے سولر سسٹمز کی تنصیب، تربت یونیورسٹی میں طالبات کے لیے کامن روم کی تعمیر، اور ایم-8 سے میری قلات تک پختہ سڑکوں کی تعمیر کے منصوبے شامل ہیں۔

مینا مجید بلوچ نے کہا کہ صوبے کے بے روزگار نوجوانوں کو باعزت روزگار کی فراہمی کے لیے حکومت موثر اقدامات کر رہی ہے۔ ہنر مند نوجوانوں کو بیرونِ ملک بھجوانے کے لیے اقدامات جاری ہیں جبکہ صوبائی اداروں میں کنٹریکٹ بنیادوں پر ملازمتوں کی فراہمی کا عمل بھی جاری ہے، تاکہ عوام میں پائی جانے والی مایوسی کا ازالہ کیا جا سکے۔ایک سوال کے جواب میں انہوں نے کہا کہ صوبے کے سرکاری اسپتالوں کو فعال بنایا جا رہا ہے اور اختیارات کو نچلی سطح پر منتقل کیا جا رہا ہے تاکہ ادویات کی خریداری ضلعی سطح پر ڈسٹرکٹ ہیلتھ آفیسرز کے ذریعے ممکن ہو۔

انہوں نے ڈی ایچ کیو اسپتال ڈیرہ بگٹی اور خاران میں آپریشن کی سہولیات کی فراہمی کو حکومت کی مؤثر پالیسیوں کا عملی مظہر قرار دیا انہوں نے تربت ٹیچنگ اسپتال میں آئی سی یو کی تعمیر اور آر ایچ سی مند کی عمارت کی تعمیرِ نو کو صوبائی حکومت کا ایک اہم کارنامہ قرار دیا۔ اس کے علاوہ مکران ڈویژن میں زراعت کے فروغ کے لیے حکومتی اقدامات کی یقین دہانی کرائی اور سرحدی تجارت کو مؤثر انداز میں چلانے کے عزم کا اظہار کیا۔ انہوں نے سب تحصیل مند میں ملا فاضل کلب کے لیے خصوصی فنڈز کی فراہمی کا بھی اعلان کیا۔