Live Updates

ہوسکتا ہے کہ صدر ٹرمپ پاکستان کا دورہ کرنے کا فیصلہ کریں

امریکی صدر اگر پاکستان کا دورہ کرتے ہیں تو یہ بڑی کامیابی ہوگی، فیلڈ مارشل عاصم منیر کا حالیہ دورہ امریکا بھی پہلے سے طے تھا، ممکن ہے وزیراعظم شہباز شریف امریکا کا دورہ کریں۔ چیئرمین پیپلزپارٹی بلاول بھٹو زرداری

ثنااللہ ناگرہ بدھ 25 جون 2025 23:43

ہوسکتا ہے کہ صدر ٹرمپ پاکستان کا دورہ کرنے کا فیصلہ کریں

اسلام آباد (اُردو پوائنٹ اخبارتازہ ترین۔ 25 جون 2025ء) چیئرمین پیپلزپارٹی بلاول بھٹو زرداری نے کہا ہے کہ ہوسکتا ہے کہ صدر ٹرمپ پاکستان کا دورہ کرنے کا فیصلہ کریں، امریکی صدر اگر پاکستان کا دورہ کرتے ہیں تو یہ بڑی کامیابی ہوگی، ممکن ہے وزیراعظم شہباز شریف امریکا کا دورہ کریں۔ انہوں نے اپنے انٹرویو میں کہا کہ فیلڈ مارشل عاصم منیر کا حالیہ دورہ امریکا بھی پہلے سے طے تھا، ممکن ہے وزیراعظم شہباز شریف امریکا کا دورہ کریں۔

وزیراعظم نے پاک بھارت جنگ کے بعد سفارتی وفد بھیجنے کا فیصلہ کیا، جس سے پاکستان میں حب الوطنی کی مثال قائم کی گئی، میڈیا نے جنگ کے دوران اہم کردار ادا کیا۔ پاکستان کا کیس مضبوط تھا ہم سچ کے ساتھ کھڑے ہیں، بھارت جھوٹے بیانیے کے ساتھ کھڑا تھا۔

(جاری ہے)

پاکستان چاہتا ہے کہ خطے میں امن ہو، تمام مسائل مذاکرات کے ذریعے حل کرنا چاہتے ہیں۔ مزید برآں چیئرمین پی پی پی بلاول بھٹو زرداری اور بی بی آصفہ بھٹو زرداری سے برطانیہ کی ہائی کمشنر جین میریٹ نے زرداری ہائوس میں ملاقات کی۔

انہوں نے ملاقات کے دوران دوطرفہ تعلقات کے فروغ پر بات چیت کی۔ چیئرمین بلاول بھٹو زرداری، بی بی آصفہ بھٹو زرداری اور برطانیہ کی ہائی کمشنر نے دونوں ممالک کے درمیان مزید تجارتی استحکام میں اضافے پر اتفاق کیا۔بدھ کو پی پی پی میڈیا سیل سے جاری بیان کے مطابق چیئرمین بلاول بھٹو زرداری اور برطانیہ کی ہائی کمشنر جین میریٹ کے درمیان بھارتی جارحیت کے بعد لندن کے دورے کے حوالے سے بھی گفتگو ہوئی۔برطانیہ کی ہائی کمشنر جین میریٹ نے چیئرمین بلاول بھٹو زرداری کے دورہ برطانیہ کو سراہا۔ چیئرمین بلاول بھٹو زرداری اور بی بی آصفہ بھٹو زرداری کے ہمراہ رکن قومی اسمبلی حنا ربانی کھر بھی موجود تھے۔