ایران میں نیوکلیئر معائنہ کاری کا دوبارہ آغاز اولین ترجیح، گروسی

یو این جمعرات 26 جون 2025 02:45

اسلام آباد (اُردو پوائنٹ ۔ UN اردو۔ 26 جون 2025ء) جوہری توانائی کے عالمی ادارے (آئی اے ای اے) کے سربراہ رافائل میریانو گروسی نے کہا ہے کہ ادارے کے معائنہ کاروں کو ایران کے جوہری مراکز پر بھیج کر انہیں بمباری سے ہونے والے نقصان کا اندازہ لگانا اور وہاں انتہائی افزودہ یورینیم کے ذخائر کی تصدیق ان کی اولین ترجیح ہے۔

انہوں نے آسٹریا کے دارالحکومت ویانا میں صحافیوں سے بات کرتے ہوئے کہا ہے کہ جوہری تنصیبات پر ابتدائی حملوں کے بعد ایران نے 'آئی اے ای اے' کو اطلاع دی تھی کہ وہ اپنے جوہری مواد اور آلات کی حفاظت کے لیے 'خصوصی اقدامات' کرے گا۔

ڈائریکٹر جنرل نے کہا کہ انہیں ایران کی وزارت خارجہ کی جانب سے ایک خط موصول ہوا ہے جس میں بتایا گیا ہے کہ ان مراکز کی حفاطت کے لیے ضروری اقدامات کر لیے گئے ہیں۔

(جاری ہے)

آئی اے ای اے کے سربراہ کا کہنا تھا کہ ایران کے حکام نے ان اقدامات کی تفصیل نہیں بتائی لیکن اس بات سے یہ تاثر ملتا ہے کہ وہاں جوہری مواد موجود ہے۔ اس کی تصدیق اور تجزیہ کرنے کے لیے معائنہ کاروں کی ایران میں واپسی ضروری ہے۔

جوہری تنصیبات پر حملے

یاد رہے کہ دو ہفتے قبل اسرائیل نے ایران کی عسکری و جوہری تنصیبات پر جنگی طیاروں اور میزائلوں کے ذریعے حملے کیے تھے۔

اس کے بعد گزشتہ ہفتے امریکہ نے ملک میں یورینیم افزودہ کرنے والے تین مراکز کو اچانک بمباری کا نشانہ بنایا۔

امریکہ کے صدر نے سوموار کی رات ایران اور اسرائیل کے مابین جنگ بندی کا اعلان کیا تھا جو کمزور ہونے کے باوجود تاحال برقرار ہے۔ تاہم، ایران میں افزودہ یورینیم کے ذخائر کو ہونے والے نقصانات کی تاحال تصدیق نہیں ہو سکی۔

جوہری معائنوں کی اہمیت

اطلاعات کے مطابق، بدھ کو ایران کی پارلیمنٹ نے 'آئی اے ای اے' کے ساتھ تعاون معطل کرنے سے متعلق ایک بل کی منظوری دی تھی جسے اب حکومت کے انتظامی شعبے کی جانب سے منظوری درکار ہے۔

ڈائریکٹر جنرل نے کہا کہ انہوں نے ایران کے وزیر خارجہ عباس عراقچی سے درخواست کی ہے کہ وہ معائنے جاری رکھنے سے متعلق جملہ تفصیلات پر بات چیت کے لیے ان سے ملنے کے ٰخواہش مند ہیں۔ عالمی برادری جوہری تنصیبات کے معائنے کے عمل میں خلل آنے کی متحمل نہیں ہو سکتی۔

ایک سوال کے ضواب میں رافائل گروسی کا کہنا تھا کہ ایران کی جانب سے جوہری عدم پھیلاؤ کے معاہدے (این پی ٹی) سے دستبرداری کا فیصلہ افسوسناک ہوگا۔ انہوں نے امید ظاہر کی کہ ایران ایسا نہیں کرے گا اور اس سے ایران سمیت کسی کو فائدہ نہیں ہو گا۔ اس کے نتیجے میں ایران دنیا میں تنہا ہو جائے گا اور اسے کئی طرح کے مسائل کا سامنا کرنا پڑے گا۔