سپر ٹیکس کیس،سپریم کورٹ نے ایڈیشنل اٹارنی جنرل سے تحریری دلائل مانگ لیے

پیر 19 مئی 2025 20:54

اسلام آباد (اُردو پوائنٹ اخبارتازہ ترین - آن لائن۔ 19 مئی2025ء)سپریم کورٹ نے سپر ٹیکس سے متعلق کیس کی سماعت 22 مئی تک ملتوی کرتے ہوئے ایڈیشنل اٹارنی جنرل سے تحریری دلائل مانگ لیے ہیں جبکہ ایف بی آر کے وکلا نے انکم ٹیکس آرڈیننس کے سیکشن فور بی پر دلائل مکمل کرلیے۔، کمپنیز کے وکیل مخدوم علی خان جمعرات کو جواب الجواب کا آغاز کریں گے۔پیر کوسپریم کورٹ کے جسٹس امین الدین خان کی سربراہی میں 5 رکنی آئینی بینچ نے سپر ٹیکس سے متعلق کیس کی سماعت کی۔

(جاری ہے)

آئینی بینچ کے سربراہ جسٹس امین الدین خان نے مخدوم علی خان سے استفسار کیا کہ آپ آپ فور بی پر جواب الجواب دینا چاہیں گے، مخدوم علی خان نے کہا کہ وکلا کے دلائل پڑھ کر جواب الجواب دوں گا۔ایڈیشنل اٹارنی جنرل عامر رحمان نے کہا کہ فور بی کے حوالے سے 3 فیصلے عدالت کے علم میں لانا چاہتا ہوں، ان تمام فیصلوں میں موجود ہے کہ کسی خاص مقصد کے لیے ایڈیشنل ٹیکس لگ سکتا ہے۔جسٹس امین الدین خان نے ایڈیشنل اٹارنی جنرل کو ہدایت کی کہ آپ تحریری شکل میں دلائل جمع کروا دیں، کیس کی سماعت 22 مئی تک ملتوی کر دی گئی۔