گورنمنٹ کمیونیکیشن سروس انٹرنیشنل، برطانیہ اور ٹی ڈیپ کے 7 رکنی وفد کا دورہ لاہور چیمبر

لاہور (اُردو پوائنٹ اخبارتازہ ترین - آن لائن۔ 19 مئی2025ء) برطانیہ کی گورنمنٹ کمیونیکیشن سروس انٹرنیشنل اور ٹریڈ ڈویلپمنٹ اتھارٹی آف پاکستان کے سات رکنی وفد نے لاہور چیمبر آف کامرس اینڈ انڈسٹری جس کا مقصد باہمی تجارتی و معاشی تعلقات مزید مستحکم کرنے کے لیے اقدامات پر تبادلہ خیال اور حکومتی سطح پر مؤثر کمیونیکیشن کے ذریعے تجارت اور معاشی ترقی کے فروغ کے لیے مشترکہ حکمت عملیوں پر غور کرنا تھا۔

وفد کی قیادت ہیڈ آف کمیونیکیشن جیسی بیہم کررہی تھیں جبکہ کمیونیکیشن مینیجر بینجمن ڈرسٹن ،ڈی جی ٹی ڈیپ رافعہ سید ،صدر لاہور چیمبر میاں ابوذر شاد اور سینئر نائب صدر انجینئر خالد عثمان نے اس موقع پر خطاب کیا۔ تقریب میں ایگزیکٹو کمیٹی ممبران جن میں خرم لودھی، احسن شاہد، سید سلمان علی، فردوس نثار، عرفان احمد قریشی، وقاص اسلم، آمنہ رندھاوا، عامر علی، محمد منیب منوں اور ملک آصف بھی شریک تھے۔

(جاری ہے)

ٹی ڈیپ کی جانب سے پاکستان ٹریڈ پورٹل پر تفصیلی پریزنٹیشن دی گئی ۔صدر لاہور چیمبر میاں ابوذر شاد نے وفد کا خیر مقدم کرتے ہوئے کہا کہ آج کی دنیا میں مؤثر کمیونیکیشن کی اہمیت پہلے سے کہیں زیادہ بڑھ چکی ہے۔ انہوں نے کہا کہ شفاف اور بروقت کمیونیکیشن ہی اعتماد کی بنیاد ہے اور یہی اعتماد معیشت کو مستحکم کرتا ہے، سرمایہ کاری کو راغب کرتا ہے، پالیسی کو مؤثر بناتا ہے اور جامع ترقی کی راہ ہموار کرتا ہے۔

انہوں نے ٹریڈ ڈویلپمنٹ اتھارٹی آف پاکستان کی کاوشوں کو سراہتے ہوئے کہا کہ ایسے ادارے کاروباری طبقے اور عوامی اداروں کے درمیان مؤثر رابطے کے لیے جو کردار ادا کر رہے ہیں وہ قابلِ ستائش ہے۔میاں ابوزر شاد نے مزید کہا کہ پاکستان اور برطانیہ کے درمیان دیرینہ تعلقات ہیں اور اسٹریٹجک کمیونیکیشن کے شعبے میں تعاون سے ان تعلقات کو مزید وسعت دی جا سکتی ہے۔

سینئر نائب صدر لاہور چیمبر انجینئر خالد عثمان نے کہا کہ پاکستان اور برطانیہ دونوں جدید، ڈیٹا پر مبنی ابلاغی نظام کو فروغ دے کر تجارتی حجم بڑھانے میں کامیاب ہو سکتے ہیں ۔انہوں نے کہا کہ لاہور چیمبر اپنی تمام تر توانائیاں برآمدی صلاحیت کو بڑھانے، کاروباری آسانیوں کو فروغ دینے اور دنیا میں پاکستان کے تجارتی نظام پر اعتماد بحال کرنے کے لیے بروئے کار لائے گا۔