Live Updates

لاہور قلندرز اپنے سب سے تگڑے غیر ملکی کھلاڑی سے محروم ہو گئی

کراچی کنگز کیخلاف پلے آف مرحلے کے اہم میچ سے قبل قلندرز کو اپنے ایک اور غیر ملکی کھلاڑی کی خدمات سے محروم ہونا پڑ گیا

محمد علی منگل 20 مئی 2025 00:04

لاہور (اُردو پوائنٹ اخبارتازہ ترین۔ 19 مئی2025ء) لاہور قلندرز اپنے سب سے تگڑے غیر ملکی کھلاڑی سے محروم ہو گئی، کراچی کنگز کیخلاف پلے آف مرحلے کے اہم میچ سے قبل قلندرز کو اپنے ایک اور غیر ملکی کھلاڑی کی خدمات سے محروم ہونا پڑ گیا۔ تفصیلات کے مطابق لاہور قلندرز نے ایچ بی ایل پی ایس ایل 10 کے پلے آف مرحلے کے لیے بنگلہ دیش کے آل رانڈر مہدی حسن میراز کے ساتھ معاہدہ کر لیا ہے۔

27سالہ مہدی حسن کے آئندہ دو روز میں ٹیم کو جوائن کرنے کی توقع ہے۔مہدی حسن زمبابوے کے آل رانڈر سکندر رضا کی جگہ اسکواڈ میں شامل ہوں گے، جو اپنی قومی ذمہ داریاں نبھانے کے لیے ٹیم سے رخصت ہو چکے ہیں۔ آف اسپنر اور نچلے نمبروں پر مفید بیٹنگ کے لیے مشہور مہدی حسن قلندرز کی لائن اپ میں ایک فیصلہ کن مرحلے پر قیمتی بین الاقوامی تجربہ اور مسابقتی برتری کا اضافہ کریں گے۔

(جاری ہے)

ٹیم ڈائریکٹر ثمین رانا نے کہا کہ ہم مہدی حسن مرزا کو قلندرز فیملی میں خوش آمدید کہنے پر بے حد خوش ہیں،اگرچہ ہم سکندر رضا کی کمی محسوس کریں گے، لیکن ان کی قومی ذمہ داریوں کا احترام کرتے ہیں اور پر اعتماد ہیں کہ مہدی حسن پلے آف مرحلے میں ہماری مہم کو مضبوطی فراہم کریں گے۔لاہور قلندرز اپنی ایچ بی ایل پی ایس ایل 10مہم کے شاندار اختتام کے لیے مکمل توجہ اور عزم کے ساتھ میدان میں اترنے کو تیار ہے۔