ہیٹ ویو 24 مئی تک جاری رہنے کا امکان ،ضلعی انتظامیہ و دیگر محکمے الرٹ رہیں، پی ڈی ایم اے پنجاب

منگل 20 مئی 2025 10:30

لاہور (اُردو پوائنٹ اخبارتازہ ترین - اے پی پی۔ 20 مئی2025ء) پی ڈی ایم اے پنجاب نے24مئی تک درجہ حرارت میں اضافے اور ہیٹ ویو بارے الرٹ جاری کردیا ۔ ترجمان پی ڈی ایم اے کے مطابق وزیر اعلیٰ پنجاب کے احکامات پر ریلیف کمشنر پنجاب نبیل جاویدنے صوبے بھر کے کمشنرز و ڈپٹی کمشنرز کو الرٹ رہنے کی ہدایات جاری کر دی ہیں جن میں کہا گیا ہے کہ ضلعی انتظامیہ سمیت متعلقہ محکمے جن میں محکمہ سکول ایجوکیشن، ہیلتھ، ٹرانسپورٹ، لوکل گورنمنٹ، ریسکیو 1122 اور دیگر شامل ہیں ،ہیٹ ویو کے حوالے سے الرٹ رہیں۔

انہوں نے بتایا کہ 20 مئی سے 24 مئی تک صوبے کے بڑے شہروں اور میدانی علاقوں میں درجہ حرارت بڑھنے اور ہیٹ ویو کے خدشات ہیں۔ان کا کہنا تھا کہ آئندہ چند روز میں درجہِ حرارت 05 سے 07 ڈگری سینٹی گریڈ معمول سے زیادہ رہنے کا خدشہ ہے ،گرمی کی لہر کے باعث میدانی علاقوں میں بعض مقامات پر تیز ہوا اور آندھی کے امکانات بھی ہیں۔

(جاری ہے)

دریں اثنا ڈی جی پی ڈی ایم اے عرفان علی کاٹھیا نے کہا ہے کہ ان دنوں میں انتظامیہ عوامی مقامات پر صاف پانی ،ہسپتالوں اور موبائل ہیلتھ یونٹس میں ہیٹ سٹروک سے متعلق ابتدائی طبی امداد کی فراہمی یقینی بنائے ۔

انہوں نے کہا کہ گرمی اور لو کی شدت میں اضافے سے عوام کو بھی محتاط رہنا ہو گا،دوپہر کے وقت کام کرنے والے لو سے بچنے کا اہتمام کریں،ہلکے رنگ کے کپڑے پہنیں ،سر ڈھانپ کر رکھیں ، بچوں اور بزرگوں کا خاص خیال رکھیں اورغیر ضروری سفر سے گریز کریں ۔ڈی جی نے کہا کہ پرنٹ ،سوشل و الیکٹرانک میڈیا کے ذریعے شہریوں کو ہیٹ ویو بارے آگاہی دی جا رہی ہے تاہم شہری ایمرجنسی میں پی ڈی ایم اے ہیلپ لائن 1129 یا ریسکیو 1122سے رابطہ کریں۔\932