Live Updates

میرواعظ مولوی محمد فاروق، خواجہ عبدالغنی لون اور شہدائے حول کوشاندار خراج عقیدت

بدھ 21 مئی 2025 15:16

سرینگر (اُردو پوائنٹ اخبارتازہ ترین - اے پی پی۔ 21 مئی2025ء) ممتاز آزادی پسندکشمیری رہنمائوں میرواعظ مولوی محمد فاروق، خواجہ عبدالغنی لون اور شہدائے حول کو آج ان کے یوم شہادت پر زبردست خراج عقیدت پیش کیا جارہا ہے۔کشمیرمیڈیاسروس کے مطابق جموں وکشمیر ڈیموکریٹک فریڈم پارٹی کے ترجمان ایڈووکیٹ ارشد اقبال نے سرینگر میں جاری ایک بیان میں کہا کہ کشمیری عوام ان عظیم شہدا ء کی قربانیوں کے مقروض ہیں جنہوں نے بھارتی قبضے سے آزادی کی خاطر اپنی جانوں کا نذرانہ پیش کیا۔

انہوں نے کہا کہ تاریخ گواہ ہے کہ اپنے نصب العین پر ثابت قدم رہنے والی اقوام نے ظالموں کے خلاف جنگ جیت کر اپنامقصد حاصل کرلیاہے۔ انہوں نے کہا کہ شہدا ء کو خراج عقیدت پیش کرنے سے کشمیریوں کے جذبہ آزادی کو تقویت ملتی ہے۔

(جاری ہے)

ترجمان نے کشمیری شہدا ء کی عظیم قربانیوں کو سراہتے ہوئے کہا کہ آزادی کا راستہ ہمیشہ کانٹوں اور مشکلات سے بھرا ہوتا ہے۔

انہوں نے امید ظاہر کی کہ وہ دن دور نہیں جب کشمیری اپنا حق خودارادیت حاصل کریں گے جس کی ضمانت اقوام متحدہ نے دے رکھی ہے۔انہوں نے کہا کہ دنیا مسئلہ کشمیر اور حق خودارادیت کے لیے لوگوں کی جائز جدوجہد سے آنکھیںبند نہیں کر سکتی اوراس مسئلے کو عوامی خواہشات اور امنگوں کے مطابق حل کرنا ہوگا۔دیگر حریت رہنمائوں اور تنظیموں نے اپنے بیانات میں کہا کہ مقبوضہ جموں و کشمیر کے عوام میر واعظ مولوی فاروق، خواجہ عبدالغنی لون اور شہدائے حول کی لازوال قربانیوں کو کبھی فراموش نہیں کریں گے جنہوں نے کشمیر کی آزادی کے لیے اپنی جانوں کا نذرانہ پیش کیا۔

حریت رہنمائوں نے کہا کہ کشمیری شہیدرہنمائوں کے مشن کو آگے بڑھانے کے اپنے عزم پر قائم ہیں۔ میر واعظ مولوی محمدفاروق کو نامعلوم مسلح افراد نے21مئی 1990کو سرینگر میں ان کی رہائش گاہ پر گولی مار کر شہید کر دیا تھا، اسی روزبھارتی فوجیوں نے سرینگر کے علاقے حول میں ان کے جلوس جنازہ پراندھا دھند فائرنگ کرکے 70بے گناہ کشمیریوں کو شہیدکردیاتھا۔ بارہ سال بعد 21مئی 2002کو نامعلوم حملہ آوروں نے خواجہ عبدالغنی لون کو اس وقت شہیدکر دیا جب وہ سرینگر کے مزار شہدا ء میں ایک اجتماع سے خطاب کے بعد واپس جا رہے تھے۔