انجینئر امیر مقام کی قیادت میں (ن)لیگ پھر نئی توانائی ،عوامی حمایت کے ساتھ ابھر رہی ہے، اسفندیار خان ایڈووکیٹ

پارٹی میں نظریاتی استقامت ،تنظیمی ڈھانچے کی مضبوطی باصلاحیت قیادت کا نتیجہ ہے، رہنماء مسلم لیگ (ن) صوابی

بدھ 21 مئی 2025 19:10

صوابی (اُردو پوائنٹ اخبارتازہ ترین - این این آئی۔ 21 مئی2025ء)پاکستان مسلم لیگ (ن)ضلع صوابی کے سیکرٹری اطلاعات اسفندیار خان ایڈووکیٹ نے اپنے بیان میں کہا ہے کہ انجینئر امیر مقام کی مضبوط قیادت میں مسلم لیگ (ن)نہ صرف خیبر پختونخوا بلکہ پورے پاکستان میں ایک بار پھر نئی توانائی اور عوامی حمایت کے ساتھ ابھر رہی ہے، انجینئر امیر مقام ایک بااصول، محب وطن، وفادار اور عوام دوست لیڈر ہیں جنہوں نے ہر مشکل وقت میں پارٹی کا علم بلند رکھا اور کارکنوں کے حوصلے کو پست نہیں ہونے دیا۔

انہوں نے کہا کہ آج مسلم لیگ (ن)کے تمام کارکن، ذمہ داران اور عہدیداران ایک باوقار قیادت میں متحد ہیں،ضلعی صدر شیراز خان نے کہا کہ انجینئر امیر مقام پارٹی کی پہچان ہیں، ان کی بصیرت اور فیصلوں کی بدولت پارٹی کارکنان میں نیا جوش اور ولولہ پیدا ہوا ہے۔

(جاری ہے)

جنرل سیکرٹری بابر خان، کوآرڈینیٹر پرائم منسٹر یوتھ پروگرام نے کہا کہ ان کی دیانتدارانہ قیادت، متحرک حکمت عملی اور کارکن دوست رویے نے پارٹی کو خیبر پختونخوا میں نئی زندگی بخشی ہے۔

ان کی محنت کی بدولت آج مسلم لیگ (ن)دوبارہ عوام کے دلوں میں جگہ بنا رہی ہے، اور ہم ان کی قیادت میں ہر سطح پر جماعت کو مضبوط کر رہے ہیں۔افتخار احمد خان ممبر سنٹرل ورکنگ کمیٹی نے مسلم لیگ (ن)کی مرکزی قیادت سے پرزور اپیل کرتے ہوئے کہا کہ خیبر پختونخوا کی موجودہ سیاسی صورتحال اور پارٹی کے اندرونی مسائل کے پیشِ نظر انہیں فوری طور پر مداخلت کرنی چاہیے۔

ان کے مطابق، صوبے میں مسلم لیگ (ن)کو مختلف دھڑوں اور گروہوں میں بٹنے سے روکنے اور اسے ایک مضبوط اور متحد قوت کے طور پر دوبارہ منظم کرنے کیلئے مرکزی قیادت کا فوری اور موثر کردار ناگزیر ہے۔ اس مقصد کے حصول کے لیے انجینئر امیر مقام کی قیادت میں پارٹی کو متحد کرنے کیلئے مرکزی قیادت کو فوری اقدامات کرنے چاہییں۔اعجاز اکرم باچہ نے کہا کہ آج پارٹی میں نظریاتی استقامت اور تنظیمی ڈھانچے کی مضبوطی صرف ایک باصلاحیت قیادت کا نتیجہ ہے۔

نواب زادہ نے کہا کہ انہوں نے ہمیشہ کارکنوں کی آواز بن کر فیصلے کیے، یہی ان کے لیڈر ہونے کا سب سے بڑا ثبوت ہے۔ سجاد خان نے کہا کہ ایک مخلص اور بہادر لیڈر کے ہوتے ہوئے ہمیں کسی بھی سیاسی محاذ سے خوف نہیں، وہ ہر دلعزیز اور کارکن دوست لیڈر ہیں۔