وزیر اعلی خیبر پختونخوا علی امین گنڈاپور کی زیر صدارت سالانہ ترقیاتی پروگرام سے متعلق اہم اجلاس منعقد

پشاور (اُردو پوائنٹ اخبارتازہ ترین - اے پی پی۔ 21 مئی2025ء) وزیر اعلی خیبر پختونخوا علی امین گنڈاپور کی زیر صدارت سالانہ ترقیاتی پروگرام سے متعلق اہم اجلاس منعقدہوا جس میں محکمہ صنعت کے تحت جاری منصوبوں پر پیش رفت کا تفصیلی جائزہ لیا گیا۔ متعلقہ کابینہ اراکین، ایڈیشنل چیف سیکرٹری منصوبہ بندی، متعلقہ انتظامی سیکرٹریز اور دیگر حکام نے اجلاس میں شرکت کی۔

وزیر اعلیٰ نے متعلقہ حکام کو فنی تعلیم کے شعبے پر خصوصی توجہ دینے کی ہدایت کی ہے اور کہا ہے کہ نوجوانوں کو روزگار دینے کے لئے فنی تعلیم کے شعبے پر خاطر خواہ سرمایہ کاری کی ضرورت ہے۔ انہوں نے ہدایت کی کہ فنی تربیت کے موجودہ نظام کو قومی اور بین الاقوامی جابز مارکیٹ کے تقاضوں سے ہم آہنگ کرنے کے لئے اقدامات کئے جائیں اور فنی تعلیم کے شعبے میں طلبہ کو سکالرشپس دینے کے لئے انڈومنٹ فنڈ قائم کیا جائے۔

(جاری ہے)

وزیر اعلیٰ نے نوجوانوں کو بین الاقوامی جاب مارکیٹس میں کھپانے کے لئے فنی تربیت کے پروگراموں کی انٹرنیشنل سرٹیفیکیشن پر کام کرنے جبکہ معیاری فنی تربیت کی فراہمی کے سلسلے میں ماسٹر ٹرینرز کی دستیابی کے لئے پروگرام شروع کرنے کی بھی ہدایت کی ہے۔انہوں نے مزید ہدایت کی کہ فنی تربیتی اداروں اور مقامی صنعتوں کے درمیان روابط کو مزید بہتر اور مضبوط بنایا جائے۔

وزیر اعلیٰ نے سرکاری محکموں میں ٹیکنیکل عملے کی بھرتی کے لئے ٹیکنیکل سرٹیفیکیشن لازمی قرار دینے کی ہدایت کرتے ہوئے واضح کیا کہ اس بات کو یقینی بنایا جائے کہ تسلیم شدہ سند کے بغیر سرکاری محکموں میں پلمبر، الیکٹریشن اور ڈرائیور سمیت کوئی بھی ٹیکنیکل عملہ بھرتی نہ ہو، ٹیکنیکل آسامیوں پر بغیر سند یافتہ امیدواروں کو بھرتی کرنا سند یافتہ امیدواروں کی حق تلفی ہے، اس مقصد کے لئے تمام محکمے متعلقہ قواعد و ضوابط میں ضروری ترمیم کر لیں،خلاف ورزی کی صورت میں متعلقہ حکام کے خلاف کارروائی عمل میں لائی جائے گی۔

وزیر اعلیٰ نے صوبے میں صنعتی اور تجارتی سرگرمیوں کے فروغ کے لئے اکنامک زونز اور انڈسٹریل زونز کے منصوبوں پر خصوصی توجہ دینے جبکہ اکنامک زونز اور انڈسٹریل زونز قائم کرنے کے جاری منصوبوں پر کام کی رفتار کو تیز کرنے کی ہدایت کی ہے۔ انہوں نے واضح کیا کہ موزوں مقامات پر نئے اکنامک زونز کے قیام کے لئے منصوبے تجویز کئے جائیں۔ وزیر اعلیٰ کا کہنا تھا کہ صنعتوں کے فروغ کے ذریعے لوگوں کے لئے روزگا رکے مواقع پیدا کئے جاسکتے ہیں۔

انہوں نے ہدایت کی کہ اس مقصد کے لئے نجی سرمایہ کاری کو راغب کرنے کے لئے اقدامات کئے جائیں۔ وزیر اعلیٰ نے کہا کہ صوبے میں صنعت کے شعبے میں سرمایہ کاری کے بے پناہ مواقع موجود ہیں، صوبائی حکومت صوبے میں سرمایہ کاری کے خواہشمند سرمایہ کاروں کو ہر ممکن سہولیات فراہم کرے گی۔ انہوں نے کہا کہ موجودہ صوبائی حکومت اس مقصد کے لئے سرمایہ کاری کے پیچیدہ عمل کو سہل بنانے اور سرمایہ کاروں کو ایک ہی چھت تلے سہولیات فراہم کرنے پر کام کر رہی ہے۔ علاوہ ازیں صوبائی حکومت اپنے منصوبوں سے پیدا ہونے والی بجلی کو سستے نرخ پر مقامی صنعتوں کو فراہم کرنے کے لئے بھی اقدامات کر رہی ہے۔