Live Updates

سچن ٹنڈولکر ’’چائے کے کپ‘‘ کے ساتھ ٹویٹ کرکے بڑی مشکل میں پھنس گئے

اس بار رافیل میں تشریف لائیے اور ہمیں ایک اور محبت بھری چائے کی میزبانی کا موقع دیجیے، پاکستانی صارفین کے تاثرات

ذیشان مہتاب جمعرات 22 مئی 2025 13:11

سچن ٹنڈولکر ’’چائے کے کپ‘‘ کے ساتھ ٹویٹ کرکے بڑی مشکل میں پھنس گئے

نئی دہلی (اردو پوائنٹ تازہ ترین اخبار ۔ 22 مئی 2025ء ) بھارت کے لیجنڈری کرکٹر سچن ٹنڈولکر نے چائے کے کپ کے ساتھ ٹویٹ کیا کہ پاکستانیوں نے بھارتیوں کو فنٹاسٹک ٹی کی یاد دلا دی۔

چائے دنیا میں سب سے زیادہ پسند اور پیا جانے والا مشروب ہے۔ 21 مئی کو چائے کا عالمی دن منایا جاتا ہے۔

بھارت کے سابق کپتان اور لیجنڈری سچن ٹنڈولکرنے چائے کے عالمی دن کے موقع پر چائے کا کپ ہاتھ میں ہاتھ کر اپنی ایک تصویر ٹویٹ کی لیکن ایسا کرنا انہیں مہنگا پڑ گیا۔

ٹنڈولکر نے ایکس پر خوبصورت پس منظر میں چائے کا کپ ہاتھ میں تھامے اپنی ایک تصویر شیئر کی جس پر لکھا کہ ’’جب چائے کی بات ہو تو ہمیشہ ایک کپ اور ہو جائے ہوتا ہے۔‘‘

سابق بھارتی کرکٹر کا یہ ٹویٹ کرنا تھا کہ پاکستانیوں نے نہ صرف ٹنڈولکر بلکہ ایک ارب سے زائد بھارتیوں کو سابق وزیر اعظم عمران خان کے دور میں 27 فروری 2019ء کی ’’فنٹاسٹک ٹی‘‘ کی یاد دلا دی۔

(جاری ہے)

ٹنڈولکر کے مذکورہ پوسٹ کرتے ہی پاکستانی صارفین نے اس پر تبصرے شروع کر دیے۔

ایک صارف نے کہا کہ فنٹاسٹک چائے کے لیے آپ کو پاکستان لینڈ کرنا ہوگا تو ایک اور صارف نے بھارتیوں کے زخم ہرا کرتے ہوئے لکھا کہ کبھی ایک کپ چائے کی قیمت لڑاکا طیارہ ہوتی ہے۔

ایک منچلے نے بھارتیوں کو ابھینندن کی یاد دلاتے ہوئے کہا کہ اس بار رافیل میں تشریف لائیے اور ہمیں ایک اور محبت بھری چائے کی میزبانی کا موقع دیجیے۔

واضح رہے کہ فروری 2019ء میں پلوامہ فالس فلیگ آپریشن کی آڑ میں بھارتی طیاروں نے پاکستانی حدود کی خلاف ورزی کی لیکن شاہین پوری طرح چوکس تھے۔ سابق وزیر اعظم عمران خان کی ہدایت پر پاک فضائیہ نے مگ 21 بھارتی طیارہ مار گرایا اور پائلٹ ونگ کمانڈر ابھیندن کو گرفتار کر لیا تھا۔

تاہم پاکستان نے روایتی مہمان نوازی کا مظاہرہ کرتے ہوئے ابھینندن کا میڈیکل کرانے کے بعد انہیں چائے پیش کی تھی اور ابھینندن نے چائے پی کر کہا تھا کہ ’’ٹی از فنٹاسٹک‘‘۔

بعد ازاں پاکستان تحریک انصاف کی حکومت نے جذبہ خیر سگالی کے تحت بھارتی پائلٹ کو رہا بھی کر دیا تھا۔