فیصل آباد،پاکستان میں آم کی کاشت کا رقبہ 159000 ہیکٹر، پیداوار 1844000 ٹن سے تجاوز کرگئی

جمعہ 23 مئی 2025 12:04

فیصل آباد (اُردو پوائنٹ اخبارتازہ ترین - این این آئی۔ 23 مئی2025ء)جامعہ زرعیہ فیصل آباد کے ماہرین اثمار نے کہا ہے کہ ملک میں آم کی کاشت کا رقبہ 159000 ہیکٹر اورآم کی پیداوار 1844000 ٹن سے تجاوز کرگئی ہے۔ انہوں نے کہا کہ جبکہ آم پاکستان میں پیدا ہونے والے تمام پھلوں میں پیداوار کے لحاظ سے دوسرے نمبر پر اور زرمبادلہ کمانے کا اہم ترین ذریعہ بھی ہے۔

(جاری ہے)

انہوں نے کہا کہ پاکستانی آم دنیا بھر میں اپنی خوشبو، لذت اور منفرد ذائقے کی وجہ سے بے انتہا پسند کئے جاتے ہیں جن کی برآمد کوبڑھا کر ملک کے لئے کثیر زرمبادلہ کمایا جا سکتا ہے۔انہوں نے کہا کہ اگرچہ گزشتہ چند سالوں میں آم کی جدید پیداواری ٹیکنالوجی پر عمل پیرا ہونے کی بدولت ملکی پیداوار میں خاطر خواہ اضافہ ہوا ہے مگر غیر موزوں طریقہ برداشت، پھل کی برآمد کے لئے سہولیات کے فقدان اور بعداز برداشت پھل پر ظاہر ہونیوالی بیماریوں کی وجہ سے پاکستان اپنی آم کی مجموعی پیداوار کا صرف 8 فیصد پھل برآمد کرتا ہے جس میں اضافہ کے لئے فوری اقدامات کی ضرورت ہے۔