سپریم کورٹ نے ضمانت مسترد ہونے کے بعد گرفتاری میں تاخیرکو ناقابل قبول قرار دے دیا

جمعہ 25 جولائی 2025 22:58

اسلام آباد (اُردو پوائنٹ اخبارتازہ ترین - این این آئی۔ 25 جولائی2025ء)سپریم کورٹ نے ضمانت مسترد ہونے کے بعد گرفتاری میں تاخیر کو ناقابل قبول قرار دے دیا۔سپریم کورٹ نے ضمانت قبل از گرفتاری کی درخواست مسترد ہونے کے باوجود ملزم زاہد خان و دیگر کی گرفتاری میں 6 ماہ کی تاخیر پر واضح کیا ہے کہ صرف سپریم کورٹ میں درخواست دائر کرنے سے گرفتاری نہیں روکی جا سکتی اور عبوری تحفظ حاصل کرنے کے لیے عدالت سے باقاعدہ اجازت ضروری ہے۔

(جاری ہے)

چیف جسٹس یحییٰ آفریدی نے 4 صفحات پر مشتمل فیصلہ جاری کرتے ہوئے کہا کہ عدالتی احکامات پر فوری عملدرآمد انصاف کی بنیاد ہے، جبکہ پولیس کی طرف سے انتظامی سہولت کو گرفتاری میں تاخیر کا جواز بنانا ناقابل قبول ہے۔سپریم کورٹ کے مطابق لاہور ہائی کورٹ سے ضمانت مسترد ہونے کے باوجود پولیس نے گرفتاری کے لیے کوئی عملی اقدام نہیں کیا، جس پر آئی جی پنجاب نے غفلت کا اعتراف کرتے ہوئے عدالتی احکامات پر عملدرآمد کے لیے سرکلر جاری کرنے کی یقین دہانی کرائی۔عدالت نے قرار دیا کہ اگر اپیل زیر التوا ہو تب بھی، جب تک کوئی حکم امتناع نہ ہو، گرفتاری سے بچاؤ ممکن نہیں۔ درخواست گزار وکیل کی جانب سے اپیل واپس لینے پر عدالت نے معاملہ نمٹا دیا۔