Live Updates

جو روٹ نے سچن ٹنڈولکر کا 15 سالہ ریکارڈ توڑ ڈالا

انگلینڈ کیلئے 13 ہزار ٹیسٹ رنز بنانے والے پہلے کرکٹر بن گئے

ذیشان مہتاب جمعہ 23 مئی 2025 12:49

جو روٹ نے سچن ٹنڈولکر کا 15 سالہ ریکارڈ توڑ ڈالا

ناٹنگھم (اردو پوائنٹ تازہ ترین اخبار ۔ 23 مئی 2025ء ) انگلینڈ کے اسٹار بیٹر جو روٹ نے بھارت میں کرکٹ کے بھگوان کہلائے جانیوالے سچن ٹنڈولکر کا ریکارڈ توڑ دیا۔

زمبابوے کیخلاف سیریز کے پہلے ٹیسٹ میچ میں جو روٹ نے تاریخ رقم کردی، وہ انگلینڈ کیلئے ٹیسٹ فارمیٹ میں 13 ہزار رنز بنانے والے پہلے بلے باز بن گئے۔

انگلش کرکٹر کو یہ سنگ میل عبور کرنے کیلئے 28 رنز درکار تھے، انہوں نے وکٹر نیاچی کی جانب سے 80ویں اوور کی پہلی گیند پر سنگل لے کر یہ کارنامہ انجام دیا، انہوں نے یہ کارنامہ سرانجام دینے والے انگلینڈ کے پہلے کرکٹر بننے کے علاوہ تیز ترین 13 ہزار رنز بنانے کا اعزاز بھی حاصل کیا۔

اس سے قبل یہ ریکارڈ جنوبی افریقا کے لیجنڈ جیک کیلس کے پاس تھا، جنہوں نے اپنے 159 ویں ٹیسٹ میں 13000 ٹیسٹ رنز مکمل کیے تھے۔

(جاری ہے)

دوسری جانب روٹ نے یہ سنگ میل محض 153 ویں ٹیسٹ میں حاصل کیا تاہم، 34 سال کی عمر میں یہ کارنامہ انجام دینے والے سب سے سست بلے باز بھی ہیں۔

جو روٹ 153، جیک کیلس 159، راہول ڈریوڈ 160، رکی پونٹنگ 162، سچن ٹنڈولکر 163 میچز میں بنائے۔

واضح رہے کہ طویل فارمیٹ میں جو روٹ واحد فعال کھلاڑی ہیں، جنہوں نے کھیل کے طویل ترین فارمیٹ میں 13000 رنز کا ہندسہ عبور کیا، انگلش کرکٹر نے اب تک 153 ٹیسٹ میچز میں 36 سنچریوں اور 65 نصف سنچریوں کی مدد سے 13006 رنز بنائے ہیں۔