Live Updates

پاکستان سے آم کی برآمد کا ہدف 1.25 لاکھ ٹن، 10 کروڑ ڈالر زرمبادلہ متوقع

آم کی برآمد کا آغاز 25 مئی سے کیا جائیگا ،اس بار چین ، ترکی کی منڈیوں پر خصوصی توجہ دی جا رہی ہے،فروٹ اینڈ ویجیٹیبل ایسوسی ایشن

جمعہ 23 مئی 2025 15:13

پاکستان سے آم کی برآمد کا ہدف 1.25 لاکھ ٹن، 10 کروڑ ڈالر زرمبادلہ متوقع

اسلام آباد(اُردو پوائنٹ اخبارتازہ ترین - این این آئی۔ 23 مئی2025ء)پاکستان فروٹ اینڈ ویجیٹیبل ایسوسی ایشن نے رواں سیزن کے دوران 1.25 لاکھ ٹن آم برآمد کرنے کا ہدف مقرر کر دیا ہے، جس سے ملک کو 10 کروڑ ڈالر کا زرمبادلہ حاصل ہونے کی توقع ہے۔ایسوسی ایشن کے سرپرست اعلیٰ وحید احمد کے مطابق آم کی برآمد کا آغاز 25 مئی سے کیا جائے گا اور اس بار چین اور ترکی کی منڈیوں پر خصوصی توجہ دی جا رہی ہے جبکہ جاپان، آسٹریلیا، امریکا اور جنوبی کوریا میں بھی پاکستانی آم کی موجودگی کو مزید مستحکم کیا جائے گا۔

رواں سیزن میں ماحولیاتی تبدیلیوں اور پانی کی قلت کے باعث آم کی پیداوار میں 20 فیصد کمی کا سامنا ہے اور مجموعی پیداوار 14 لاکھ 40 ہزار ٹن رہنے کا امکان ظاہر کیا گیا ہے۔

(جاری ہے)

وحید احمد نے امید ظاہر کی کہ رواں برس جنوبی افریقہ کی نئی منڈی بھی پاکستان کو میسر آئے گی اور اس سلسلے میں جنوبی افریقہ کے ماہرین کا وفد جلد پاکستان کا دورہ کرے گا تاکہ آم کی برآمد کی منظوری دی جا سکے۔

ایسوسی ایشن نے حکومت سے مطالبہ کیا کہ وہ شپنگ کمپنیوں کی جانب سے اضافی فریٹ چارجز کا نوٹس لے، کیونکہ ان کے باعث برآمد کنندگان کو مالی نقصان کا سامنا ہے، اس کیساتھ ساتھ ماحولیاتی اثرات سے نمٹنے اور پیداوار میں بہتری کے لیے ریسرچ اینڈ ڈیولپمنٹ کو ترجیحی بنیادوں پر فروغ دینے کی ضرورت پر بھی زور دیا گیا ہے۔