پنجاب حکومت نوجوانوں کو ہنر مند اورروزگار کے بہتر مواقع فراہم کرنے کے لیے عملی اقدامات اٹھا رہی ہے: وزیر بلدیات پنجاب

سرگودھا (اُردو پوائنٹ اخبارتازہ ترین - اے پی پی۔ 23 مئی2025ء) پنجاب حکومت نوجوانوں کو ہنر مند بنانے اور انہیں روزگار کے بہتر مواقع فراہم کرنے کے لیے عملی اقدامات اٹھا رہی ہے، "چیف منسٹر اسکلڈ پنجاب انیشی ایٹو‘‘ اسی وژن کی عملی تعبیر ہے۔ان خیالات کا اظہار وزیر بلدیات پنجاب زیشان رفیق نے جمعہ کے روز مقامی ہال میں’’میری ڈیجیٹل دنیا" پروگرام کے تحت تعلیم یافتہ دیہی خواتین میں ڈیسک ٹاپ کمپیوٹرز کی تقسیم کے موقع پر بطور مہمانِ خصوصی خطاب کرتے ہوئے کیا۔

انہوں نے کہا کہ وزیراعلیٰ پنجاب کی ہدایت پر یہ پروگرام پورے صوبے میں مرحلہ وار جاری ہے جس کا مقصد دیہی خواتین کو خود مختار بنانا اور ڈیجیٹل معیشت میں ان کا کردار بڑھانا ہے۔ انہوں نے کہا کہ سرگودہا ڈویژن کے نوجوانوں میں بے پناہ صلاحیت موجود ہے، حکومت ان کی رہنمائی اور سہولت کاری کے لیے ہر ممکن اقدامات کر رہی ہے۔

(جاری ہے)

وزیر بلدیات نے مزید کہا کہ وزیراعلیٰ پنجاب کی ہدایت پر شروع کیا گیا یہ منصوبہ صرف کمپیوٹرز کی تقسیم نہیں بلکہ ایک سوچ کی تبدیلی کی علامت ہے۔

ہم اپنے نوجوانوں کو خیرات نہیں، ہنر دے رہے ہیں تاکہ وہ دوسروں کے محتاج نہ ہوں بلکہ اپنے پیروں پر کھڑے ہو کر دوسروں کے لیے مثال بنیں۔ انہوں نے کہا کہ آج کے دور میں ڈیجیٹل مہارت روزگار کی کنجی ہے اور حکومت پنجاب چاہتی ہے کہ ہر نوجوان اس کنجی کا مالک بنے۔انہوں نے اس بات پر زور دیا کہ "میری ڈیجیٹل دنیا" جیسا منصوبہ نہ صرف نوجوانوں کی زندگی بدل رہا ہے بلکہ پنجاب کو ایک ترقی یافتہ اور باہنر معاشرہ بنانے کی سمت میں اہم قدم ہے۔

صوبائی وزیر کا کہنا تھا کہ 78 سالوں سے خواتین کو معاشی طور پر خود مختار بنانے کی صرف باتیں کی گئیں جبکہ پنجاب کی پہلی خاتون وزیر اعلی مریم نواز شریف نے عملی اقدامات کیے ہیں ۔ پنجاب میں ہزاروں طلبہ کو میرٹ پر لیپ ٹاپ دہے جا رہے ہیں ۔انہوں نے کہا کہ جب تک ہم اپنے نو جوانوں کو ٹولز اور ٹرینگ نہیں دینگے اس آئی ٹی دور میں دنیا کا مقابلہ نہیں کر سکیں گے۔

زیشان رفیق کا کہنا تھا کہ پڑھی لکھی دیہی خواتین کو ڈیجیٹل مارکیٹ کا راستہ دکھا کر ہم اپنی آنے والی نسلوں کو بھی بہتر بنا سکتے ہیں۔ پنجاب سکلز ڈویلپمنٹ ٹاسک فورس رواں سال ایک ہزار دیہی خواتین کو جدید ڈیسک ٹاپ اور تربیت فراہم کر رہی ہے جبکہ اگلے سال یہ تعداد دگنی ہو جائے گی۔ تقریب میں مجموعی طور پر 43 دیہی خواتین کو جدید ڈیسک ٹاپ کمپیوٹرز دیے گئے تاکہ وہ آن لائن فری لانسنگ، آئی ٹی، اور دیگر ڈیجیٹل ہنر سیکھ کر اپنے معاشی مستقبل کو بہتر بنا سکیں۔

تقریب کا انعقاد پنجاب اسکلز ڈویلپمنٹ فنڈ ( پی ایس ڈی ای) اور محکمہ اسکلز ڈویلپمنٹ اینڈ انٹرپرینیورشپ کی جانب سے کیا گیا تھا، جس میں چیئرمین وزیراعلی پنجاب ٹاسک فورس برائے سکلز عدنان افضل ، پراجیکٹ ڈائریکٹر مرزا اکبر حسین ، اے ڈی سی آر فہد محمود سابق ایم پی ایز چوہدری عبد الرزاق ڈھلوں ، ڈاکٹر لیاقت علی خان ، ڈپٹی ڈائریکٹر لوکل گورنمنٹ بابر شہزاد رانجھا اور سی او ضلع کونسل اسد ہریا کے علاؤہ پی ایس ڈی ایف کی ٹیم شریک تھی۔