نیدرلینڈزکے سائیکلسٹ اولاو کویج نے گیرو ڈی اٹالیہ سائیکل ریس کا بارہواں مرحلہ جیت لیا

ہفتہ 24 مئی 2025 12:38

روم(اُردو پوائنٹ اخبارتازہ ترین - این این آئی۔ 24 مئی2025ء)نیدرلینڈز کے سائیکلسٹ اولاو کویج نے گیرو ڈی اٹالیہ سائیکل ریس کا بارہواں مرحلہ جیت لیا۔ 23 سالہ اولاو کویج کی یہ گیروڈی اٹالیہ ریس میں پہلی سٹیج فتح ہے۔ البانیہ سے گیرو ڈی اٹالیہ کا 108 واں ایڈیشن شروع ہوچکا ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔

گیرو ڈی اٹالیہ سائیکل ریس کے بارہویں مرحلے میں سائیکل سواروں نے موڈینا سے ویاڈانا تک کا فاصلہ طے کرنا تھا جو کہ سیدھے راستے پر 172 کلو میٹر پر محیط تھا۔23 سالہ نیدرلینڈز کے سائیکلسٹ اولاو کویج نے عمدہ سائیکلنگ کا مظاہرہ کرتے ہوئے 172کلومیٹر کا فاصلہ 3گھنٹی55منٹ اور 40 سیکنڈز میں طے کرکے 12ویں مرحلے میں پہلی پوزیشن حاصل کی۔

(جاری ہے)

23 سالہ نیدرلینڈز کے ہی سائیکل سوار کیسپر وین اڈن نے بارہویں مرحلے میں دوسری جبکہ برطانوی سائیکلسٹ بین ٹرنر نے تیسری پوزیشن حاصل کی۔

ریس میں ڈنمارک کے سائیکلسٹ میڈس پیڈرسن کا پنک جرسی پر قبضہ تاحال برقرار ہے۔گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی جس میں دنیا کے نامور سائیکلسٹس شریک ہیں۔ گیرو ڈی اٹالیہ سائیکل ریس 21 مرحلوں پر محیط ہے جس میں سائیکل سوار 3443.3 کلو میٹر کا سفر طے کرینگے۔ گیرو ڈی اٹالیہ سائیکل ریس میں 23 ٹیمیں ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس 23 روز جاری رہنے کے بعد یکم جون کو اختتام پذیر ہوگی۔