تیسرا ٹی ٹوئنٹی؛ بنگلہ دیش کا پاکستان کو جیت کیلئے 197 رنز کا ہدف

یہ مہمان ٹیم کا پاکستان کے خلاف تاریخ کا سب سے بڑا سکور ہے، سیریز میں پاکستان کو فیصلہ کن برتری حاصل

ساجد علی اتوار 1 جون 2025 21:46

تیسرا ٹی ٹوئنٹی؛ بنگلہ دیش کا پاکستان کو جیت کیلئے 197 رنز کا ہدف

لاہور ( اُردو پوائنٹ اخبارتازہ ترین۔ 01 جون 2025ء ) تیسرے ٹی ٹوئنٹی میچ میں بنگلہ دیش نے پاکستان کو جیت کیلئے 197 رنز کا ہدف دے دیا۔ تفصیلات کے مطابق دونوں ٹیموں کے درمیان سیریز کا تیسرا میچ بھی لاہور میں کھیلا جارہا ہے جہاں پاکستان نے تیسرے ٹی ٹوئنٹی میں بنگلہ دیش کیخلاف ٹاس جیت کر پہلے فیلڈنگ کا فیصلہ کیا تو بنگلہ دیش کی جانب سے تنزید حسن اور پرویز حسین ایمان نے ٹیم کو 110 رنز کا آغاز فراہم کیا، پرویز نے اپنی نصف سینچری مکمل کی وہ 34 گیندوں پر 4 چھکوں اور 7 چوکوں کی مدد سے 66 رنز بناکر آؤٹ ہوئے۔

جب کہ تنزید حسن 6 رنز کی کمی سے نصف سینچری مکمل نہ کرسکے اور 44 رنز پر پویلین واپس لوٹ گئے، کپتان لٹن داس 22 اور توحید ہریدوئے نے 25 رنزبنائے، ذاکر علی 15 اور تنظیم حسن ثاقب نے 8 رنز بنانے میں کامیاب رہے، پاکستان کی طرف سے حسن علی، عباس آفریدی نے 2،2، فہیم اشرف اور شاداب خان نے ایک ایک کھلاڑی کو آؤٹ کیا۔

(جاری ہے)

پاکستان کو تین میچوں کی سیریز میں مہمان ٹیم کے خلاف 2 صفر کی فیصلہ کن برتری حاصل ہے، پاکستان کی جانب سے آخری میچ میں ایک تبدیلی کی گئی ہے، قومی ٹیم مینجمنٹ نے فاسٹ باؤلر حارث رؤف کی جگہ عباس آفریدی کو پلینگ الیون میں شامل کیا ہے۔

آج کے میچ کے لیے پاکستان کی پلیئنگ الیون میں سلمان علی آغا (کپتان)، صاحبزادہ فرحان، صائم ایوب ، محمد حارث ، حسن نواز، شاداب خان ، خوشدل شاہ ، فہیم اشرف ، حسن علی ، عباس آفریدی اور ابراراحمد شامل ہیں جب کہ بنگلہ دیش نے لٹن داس ( کپتان )، تنزید حسن، توحید ہریدوئے، پرویز حسین، ذاکر علی ( وکٹ کیپر)، شمیم حسین، مہدی حسن مرزا، رشاد حسین، تنظیم حسن ثاقب، حسن محمود اور خالد احمد پر مشتمل تیم میدان میں اتاری ہے۔