قومی ہیرو ارشد ندیم وطن واپس پہنچ گئے

انہوں نے ایشین ایتھلیٹکس چیمپئن شپ میں 52 سال بعد گولڈ میڈل جیت کر ملک کا نام روشن کیا

ساجد علی اتوار 1 جون 2025 22:57

لاہور ( اُردو پوائنٹ اخبارتازہ ترین۔ 01 جون 2025ء ) ایشین ایتھلیٹکس چیمپئن شپ میں 52 سال بعد گولڈ میڈل جیت کر ملک کا نام روشن کرنے والے قومی ہیرو ارشد ندیم وطن واپس پہنچ گئے۔ تفصیلات کے مطابق قومی ہیرو نے ایشیئن ایتھلیٹکس چیمپیئن شپ جیولین تھرو میں گولڈ میڈل اپنے نام کیا جہاں جیولین تھرو فائنل میں ارشد ندیم نے سب سے دور 86.40 میٹر کی تھرو کی، ارشد ندیم نے 52 سال بعد ایشیئن ایتھلیٹکس میں پاکستان کے لیے گولڈ میڈل جیتا، ارشد ندیم نے 2 بھارتی ایتھلیٹس سمیت دیگر کو ہرایا۔

بتایا گیا ہے کہ قومی ہیرو جنوبی کوریا سے وطن واپس پہنچ گئے ہیں، وہ لاہور ایئرپورٹ پر پہنچے تو وہاں ڈی جی اسپورٹس بورڈ پنجاب، اہل خانہ اور دوستوں نے ارشد ندیم کا بھرپور استقبال کیا، لاہور ایئرپورٹ پر میڈیا سے گفتگو کرتے ہوئے ان کی والدہ نے کہا کہ میرے بیٹے نے پہلے بھی ملک کا نام روشن کیا، آج بھی ملک کا نام روشن کرکے آیا ہے، پنجاب حکومت کی جانب سے ارشد ندیم کو بہترین سہولیات دی گئی ہیں جس پر وزیراعلیٰ پنجاب مریم نواز کے شکر گزار ہیں۔

(جاری ہے)

اس سے پہلے وطن روانگی سے قبل ارشد ندیم کا ایک پیغام میں کہنا تھا کہ سب کی دعاؤں سے اللّٰہ تعالیٰ نے فائنل میں کامیابی دی اور پورے پاکستان کو عزت دی، وطن پہنچ رہا ہوں بڑی خوشی ہو رہی ہے کہ پیرس اولمپکس کے بعد اللّٰہ تعالیٰ نے پاکستان کو ایک اور فتح سے نوازا، ایشین ایتھلیٹکس چیمپین شپ میں گولڈ میڈل میری اور کوچ کی محنت کا نتیجہ ہے، بڑی خوشی ہو رہی ہے، پیرس اولمپکس کے بعد یہ میرا پہلا ایونٹ تھا، اللّٰہ تعالیٰ نے اس ایونٹ میں بھی پاکستان کو فتح دی۔