اوکاڑہ،جی ٹی روڈ پر خوفناک ٹریفک حادثہ، بدقسمت فیملی کے 3 بچوں سمیت 4 افراد جاں بحق ہوگئے

ہفتہ 24 مئی 2025 17:23

اوکاڑہ (اُردو پوائنٹ اخبارتازہ ترین - اے پی پی۔ 24 مئی2025ء) اوکاڑہ جی ٹی روڈ پر خوفناک ٹریفک حادثہ میں بدقسمت فیملی کے 3 بچوں سمیت 4 افراد جاں بحق ہوگئے۔ باپ موٹر سائیکل پر بچوں کو سکول چھوڑنے جا رہا تھا کہ تیز رفتار ٹرالر نے ٹکر مار دی ۔

(جاری ہے)

بتایا گیا ہے کہ چک نمبر 24 ٹو آر کا رہائشی 43 سالہ محمد ندیم موٹر سائیکل پر سوار ہوکر اپنے 2 بیٹوں 10 سالہ آریان،8 سالہ ایان اور 6 سالہ بیٹی عائزہ فاطمہ کو ان کے سکول چھوڑنے جا رہا تھا جیسے ہی وہ جی ٹی روڈ پنجاب کالج اوکاڑہ کے قریب پہنچا تو تیز رفتار ٹرالر نے بے قابو ہوکر موٹر سائیکل کو ٹکر ماردی ،ٹکر کے نتیجہ میں موٹر سائیکل سوار روڈ پر گر گئی اور ٹرالر نے انہیں کچل دیا ۔

حادثےکے نتیجےمیں باپ اپنے 2 بیٹوں اور ایک بیٹی سمیت موقع پر ہی جاں بحق ہوگیا ۔ حادثے کی اطلاع ملتے ہی ریسکیو 1122 اور پولیس کی ٹیمیں جائے حادثہ پر پہنچ گئیں۔ پولیس نے ضروری کارروائی کرتے ہوے ٹرالر کو اپنی تحویل میں لے لیا، جبکہ ریسکیو ٹیموں نے امدادی کارروائیاں کرتے ہوئے لاشوں کوڈسٹرکٹ ہیڈکوارٹر ہسپتال منتقل کردیا۔ حادثے کی اطلاع سنتے ہی جاں بحق ہونے والوں کے گھر میں صف ماتم بچھ گئی اورپورا گاؤں سوگوارہو گیا۔\378