Live Updates

شہزاد رائے کا پرانا گانا نئے انداز میں آنٹیوں کے نام

آنٹی ورژن سوشل میڈیا پر ہِٹ، نیا انداز خواتین مداحوں کوخوب بھا گیا

ہفتہ 24 مئی 2025 19:28

شہزاد رائے کا پرانا گانا نئے انداز میں آنٹیوں کے نام

لاہور(اُردو پوائنٹ اخبارتازہ ترین - آن لائن۔ 24 مئی2025ء)پاکستان کے مشہور گلوکار، سماجی کارکن اور طنزیہ حس کے مالک شہزاد رائے نے ایک بار پھر مداحوں کو حیرت میں ڈال دیا جب انہوں نے اپنے کلاسک گانے تیرا مکھڑا حسیں جادو کر گیا کو ایک دل چسپ اور ہنسی سے بھرپور انداز میں دوبارہ پیش کیا۔انسٹاگرام پر شیئر کی گئی نئی ویڈیو میں شہزاد رائے نے 2002 کے اپنے مشہور گانے کے بول میں دلچسپ تبدیلی کرتے ہوئے اسے آج کی آنٹیوں کے نام کر دیا۔

اس بار گانے کے بول تھے،میں نے دیکھی ہیں آنٹیاں بڑی حسیں، لیکن تیرے جیسا کوئی نہیں۔یہ طنزیہ اور مزاحیہ ترمیم فورا ہی سوشل میڈیا پر چھا گئی اور انسٹاگرام کے کمنٹ سیکشن میں دلچسپ تبصروں کا طوفان آگیا۔ویڈیو دیکھنے والی کئی خواتین صارفین نے ہنستے ہوئے تسلیم کیا کہ جب یہ گانا پہلی بار ریلیز ہوا تھا، تب وہ لڑکیاں تھیں اور اب وقت کے ساتھ آنٹیاں بن چکی ہیں۔

(جاری ہے)

ایک صارف نے لکھا، لڑکیوں سے آنٹیوں تک کا سفر پہلی بار اچھا محسوس ہو رہا ہی!دوسری جانب ایک مداح نے اپنے جذبات کا اظہار کرتے ہوئے کہا یہ گانا سن کر میرا بچپن یاد آ گیا، شہزاد رائے ہمیشہ کلاسک رہے گا!مداحوں نے شہزاد رائے کے مزاحیہ انداز کو خوب سراہا اور انہیں انسٹاگرام پر مزید ایکٹو ہونے کا مشورہ دیا۔اس تخلیقی اپروچ نے ایک بار پھر یہ ثابت کر دیا کہ شہزاد رائے صرف ایک گلوکار ہی نہیں بلکہ ایک باشعور فنکار بھی ہیں جنہیں وقت کے ساتھ خود کو نئے انداز میں پیش کرنے کا فن خوب آتا ہے۔

واضح رہے کہ تیرا مکھڑا حسیں پہلی بار 2002 میں ریلیز ہوا تھا اور اس وقت اسے بیپناہ مقبولیت حاصل ہوئی تھی۔2021 میں بھی اس کی ری ویڈیو ریلیز نے پرانی یادوں کو تازہ کیا تھا، اور اب 2025 میں یہ گانا ایک بار پھر نئی زندگی کے ساتھ مداحوں کے دل جیت رہا ہے۔دوسری جانب شہزاد رائے اور معروف اداکارہ سجل علی کے درمیان بڑھتی قربتوں پر بھی سوشل میڈیا پر چہ مگوئیاں ہو رہی ہیں، تاہم اس حوالے سے دونوں ستاروں کی جانب سے کوئی باضابطہ تصدیق یا تردید سامنے نہیں آئی ہے۔