اسلام آباد میں شیشہ کیفے کے خلاف ضلعی انتظامیہ کی سخت کارروائیاں، 7 سیل،7 گرفتار

ہفتہ 24 مئی 2025 20:15

اسلام آباد (اُردو پوائنٹ اخبارتازہ ترین - این این آئی۔ 24 مئی2025ء) اسلام آباد میں ضلعی انتظامیہ نے غیر قانونی انڈور شیشہ کیفے کے خلاف بھرپور کارروائی کا آغاز کر دیا۔ عدالتی احکامات کی خلاف ورزی پر متعدد کیفے سیل کیے گئے اور گرفتاریاں عمل میں آئیں۔ ڈی سی عرفان میمن نے واضح کیا ہے کہ جہاں بھی انڈور کیفے فعال پائے گئے، وہاں متعلقہ افسر کے خلاف کارروائی ہو گی۔

تفصیلات کے مطابق وفاقی دارالحکومت میں ضلعی انتظامیہ نے غیر قانونی انڈور شیشہ کیفے کے خلاف کارروائیاں تیز کر دی ہیں۔

(جاری ہے)

ڈی سی اسلام آباد عرفان نواز میمن کی ہدایت پر شہر بھر میں بلا تفریق چھاپے مارے جا رہے ہیں۔اس سلسلے میں اسسٹنٹ کمشنر سٹی ماحین حسن کی جانب سے ایف سکس، ایف سیون اور ای سیون سیکٹرز میں کارروائیاں کی گئیں، جن کے دوران سات شیشہ کیفے سیل کر دیے گئے اور سات افراد کو گرفتار کیا گیا۔ ٹیم نے شیشہ اور فلیورز کو بھی قبضے میں لے لیا۔انتظامیہ کے مطابق یہ کارروائیاں عدالتی احکامات کی خلاف ورزی پر کی جا رہی ہیں۔ ڈی سی اسلام آباد نے ہدایت کی ہے کہ تمام اسسٹنٹ کمشنرز اپنے اپنے علاقوں میں غیر قانونی انڈور کیفے کے خلاف فوری کارروائیاں یقینی بنائیں۔