سول ہسپتال منگلور اور دلشاد نرسنگ کالج کے مابین پیش آنے والے ناخوشگوار واقعے کا خوش اسلوبی سے حل

اتوار 25 مئی 2025 20:15

پشاور(اُردو پوائنٹ اخبارتازہ ترین - این این آئی۔ 25 مئی2025ء)چند روز قبل سول ہسپتال منگلور کی انتظامیہ اور دلشاد نرسنگ کالج کے طلباء کے درمیان ایک ناخوشگوار واقعہ پیش آیا، جس کے بعد فریقین کے درمیان صلح و مفاہمت کے لیے ڈپٹی کمشنر سوات شہزاد محبوب کی ہدایات پر ایک جرگے کا انعقاد کیا گیا۔ڈپٹی کمشنر سوات کی خصوصی ہدایات پر ایڈیشنل اسسٹنٹ کمشنر-II بابوزئی طارق خان، محکمہ صحت کے متعلقہ حکام، جن میں میڈیکل سپرنٹنڈنٹ، ڈپٹی ڈسٹرکٹ ہیلتھ آفیسر سوات اور ای پی آئی کوآرڈینیٹر ڈاکٹر لیاقت علی خان شامل تھے، کی مشترکہ کوششوں سے یہ جرگہ منعقد ہوا۔

جرگے میں متوڑیزئی قومی جرگہ، منگلور جرگہ، علاقے کے معزز مشران، دلشاد نرسنگ کالج کی پرنسپل میڈم دلشاد، سول ہسپتال کے نمائندگان اور دیگر معززین نے بھی شرکت کی۔

(جاری ہے)

اس موقع پر محکمہ صحت کے حکام نے پیش آنے والے واقعے پر افسوس کا اظہار کیا اور تمام فریقین کے جذبات و تحفظات کو مدنظر رکھتے ہوئے غیر مشروط طور پر معذرت پیش کی۔ انہوں نے اس بات پر زور دیا کہ تمام ادارے باہمی احترام، تعاون اور برداشت کے اصولوں پر عمل پیرا ہو کر کام کریں تاکہ مستقبل میں ایسے کسی ناخوشگوار واقعے کی نوبت نہ آئے۔

جرگے کے نتیجے میں فریقین کے درمیان غیر مشروط طور پر راضی نامہ طے پایا، جس سے مسئلہ خوش اسلوبی سے حل ہوگیا۔مزید برآں، میڈم دلشاد نے ڈاکٹر لیاقت علی خان (ای پی آئی کوآرڈینیٹر) کو یہ ذمہ داری سونپی کہ وہ آئندہ ایسے واقعات کی روک تھام کے لیے مؤثر اقدامات کو یقینی بنائیں، تاکہ طبی و تعلیمی اداروں کے درمیان باہمی ہم آہنگی کو فروغ حاصل ہو۔آخر میں ضلع انتظامیہ سوات نے میڈم دلشاد کا شکریہ ادا کیاجنہوں نے معاملے کو سنجیدگی اور بردباری کے ساتھ سلجھانے میں کلیدی کردار ادا کیا۔