Live Updates

یوکرین پر روس کے تابڑ توڑ ڈرون حملوں پر تشویش کا اظہار

یو این اتوار 25 مئی 2025 23:15

اسلام آباد (اُردو پوائنٹ ۔ UN اردو۔ 25 مئی 2025ء) اقوام متحدہ نے یوکرین میں روس کے حالیہ میزائل اور ڈرون حملوں پر گہری تشویش کا اظہار کیا ہے جن میں کم از کم 13 شہری ہلاک اور 65 زخمی ہو گئے ہیں۔

ملک میں انسانی حقوق کی صورتحال پر اقوام متحدہ کے نگران مشن (ایچ آر ایم ایم یو) نے خبردار کیا ہے کہ گنجان آبادیوں پر طاقتور دھماکہ خیز ہتھیاروں سے حملوں کے سنگین نتائج برآمد ہونے کا خدشہ ہے۔

مشن کے مطابق، اتوار کی رات سے اگلے دن تک جاری رہنے والے حملے اس جنگ میں اب تک اس نوعیت کی سب سے بڑی کارروائی ہیں۔

(جاری ہے)

دارالحکومت کیئو سمیت یوکرین کے 10 علاقوں میں ان حملوں سے لوگوں کے گھروں سمیت شہری تنصیبات کو بھی نقصان پہنچا۔

روس کے ان حملوں میں کم از کم تین بچے ہلاک اور نو زخمی ہوئے۔ مشن اس کارروائی سے ہونے والے نقصان کی مصدقہ تفصیلات جمع کر رہا ہے۔

مشن کی سربراہ ڈینیل بیل نے کہا ہے کہ یہ حملہ شہری علاقوں میں طاقتور اسلحے کے استعمال سے لوگوں کی زندگیوں کو لاحق خطرات کی المناک عکاسی کرتا ہے۔

حالیہ واقعات اس جنگ میں انسانی جانوں کا ایک اور بڑا نقصان ہیں جنہوں نے لوگوں کے دکھوں میں مزید اضافہ کر دیا ہے۔

دور مار ہتھیاروں کا استعمال

یوکرین کے حکام نے بتایا ہے کہ روس کی فوج نے حالیہ حملوں کے دوران فضا، سمندر اور خشکی سے کارروائی کی اور ملک پر کم از کم 367 میزائل داغے۔ اس سے پچھلی رات بھی ایسا ہی حملہ کیا گیا تھا جس میں دارالحکومت کیئو کو نشانہ بنایا گیا۔

مشن نے کہا ہے کہ شہری علاقوں پر طویل فاصلے تک مار کرنے والے میزائلوں کے حملے مارچ اور اپریل میں انسانی جانوں کے بڑے پیمانے پر نقصان کا بنیادی سبب تھے۔ اگرچہ مئی میں انسانی نقصان اب تک قدر ےکم تھا تاہم حالیہ حملے کے بعد یہ اپریل کے نقصان سے تجاوز کر جائے گا۔

شہری تنصیبات کی تباہی

یوکرین کے لیے اقوم متحدہ کے امدادی رابطہ دفتر کے نمائندے میتھائس شمالے نے بھی روس کے حملوں میں شہریوں کے نقصان پر گہری تشویش ظاہر کی ہے۔

ان کا کہنا ہے کہ یوکرین بھر میں شہریوں کے لیے کوئی بھی جگہ محفوظ نہیں رہی۔ حملوں میں لوگوں کے گھروں اور شہری تنصیبات کو نشانہ بنایا جا رہا ہے۔

انہوں نے غیرسرکاری امدادی اداروں اور حکومتی خدمات کا شکریہ ادا کیا ہے جو حملوں سے متاثرہ لوگوں کو فوری مدد کی فراہمی میں مصروف ہیں۔ نمائندے کا کہنا ہے کہ شہریوں کو کسی بھی طرح کے حالات میں عسکری کارروائیوں کا ہدف نہیں بنانا چاہیے۔