Live Updates

قومی ورثہ و ثقافت ڈویژن کے زیراہتمام معرکہ حق اور یوم تکبیر کے حوالے سے خصوصی تقریب

بدھ 28 مئی 2025 22:58

لاہور (اُردو پوائنٹ اخبارتازہ ترین - آن لائن۔ 28 مئی2025ء) ایوان اقبال کمپلیکس ،قومی ورثہ و ثقافت ڈویژن کے زیراہتمام معرکہ حق اور یوم تکبیر کے حوالے سے خصوصی تقریب' اقبال اور بنیان مرصوص' ہوئی جس کی صدارت ایڈمنسٹریٹر ایوان اقبال کمپلیکس انجم وحید نے کی جبکہ چیئرمین تکمیل پاکستان اتحاد، کرنل ریٹائرڈ محمد افضل رانا، لیفٹیننٹ کرنل ریٹائرڈ سید سخاوت حسین بخاری، ماہر اقبالیات و صدر پاکستان محافظ پارٹی ڈاکٹر محمد سلیم رائو اور سابق اے جی پنجاب و مرکزی صدر پاکستان قومی زبان تحریک محمد جمیل بھٹی نے خطاب کیا۔

تلاوت قرآن پاک کی سعادت قاری عبدالکریم نے حاصل کی۔ حضورؐ کی خدمت میں گلہائے عقیدت محمد بلال بٹ نے پیش کئے، نقابت کے فرائض ینگ اقبال سکالر زید حسین نے سرانجام دئیے۔

(جاری ہے)

تقریب سے خطاب کے دوران مقررین نے کہا چند گھنٹوں میں اپنے سے کئی گنا بڑے دشمن کو ناکوں چنے چبوانا کسی کرامت سے کم نہیں،ہماری پاک افواج نے یہ ثابت کر دیا کہ ہمارے وسائل جتنے بھی کم ہیں مگر ہم میں جذبہ ایمانی موجود ہے جس کے تحت ہم دشمن کو پچھاڑ سکتے ہیں۔

انہوں نے کہا ہماری ایٹمی طاقت پاکستان کے بقا کی ضامن ہے،جس طرح قیام پاکستان ،65 کی جنگ میں قوم کا جذبہ نظر آیا یہی مظاہرہ اس نے آپریشن بنیان مرصوص کے دوران دکھایا اور اللہ تعالیٰ نے کامیابی سے نوازا۔ مقررین نے مزید کہا ہمیں بحیثیت قوم اور خصوصی طور پر نوجوان نسل کو جدید علوم، سائنس و ٹیکنالوجی میں مہارت حاصل کرنا ہو گی تاکہ ملک کو معاشی میدان میں بھی آگے لیکر جائیں۔

انہوں نے کہا نوجوان نسل کو مایوسی کے بجائے زندگی کے ہر شعبے میں مہارت حاصل کرنا ہو گی تاکہ وہ عملی طور پر اقبال کے شاہین بن سکیں اور اپنی کمندیں ستاروں پہ ڈالیں۔ معرکہ حق اور یوم تکبیر منانے کا اصل تقاضا یہی ہے کہ ہم عہد کریں کہ بے بنیاد پراپیگنڈا پر کان دھرنے کے بجائے اپنی توجہ ملک و قوم کی ترقی و سلامتی پر مرکوز کریں تاکہ دنیا خاص طور پر عالم اسلام میں ہمارا مقام صف اول میں آئے اور ہمارا ملک حقیقی معنوں میں قائد اور اقبال کا پاکستان بن سکے۔ تقریب میں سماجی رہنما شازیہ ناصر، عرفان بھٹی، پروفیسر ارشد، پروفیسر قمر الاسلام، محمد اشرف، ظفر احمد رانا، مرتضیٰ رشید سمیت طلبہ و طالبات کی کثیر تعداد نے شرکت کی۔