Live Updates

واسا ملتان شہریوں کو بہتر خدمات فراہم کرنے کیلئے دن رات کوشاں ہے، منیجنگ ڈائریکٹر

بدھ 28 مئی 2025 21:30

ملتان (اُردو پوائنٹ اخبارتازہ ترین - اے پی پی۔ 28 مئی2025ء) منیجنگ ڈائریکٹر واسا خالد رضا خان نے کہا ہے کہ شہریوں کو بہتر خدمات فراہم کرنے کیلئے دن رات کوشاں ہیں ۔ یہ بات انہوں نے عیدالاضحیٰ کی آمد کے حوالے سے فراہمی و نکاسی آب کے انتظامات کا جائزہ لینے کےلئے دورہ کے دوران کہی ۔ انہوں نے سیوریج اور روڈز کی بحالی کے منصوبوں کے معائنے کے لیے پیراں غائب روڈ، عثمان غنی روڈ اور الجیلان روڈ کا دورہ کر کے منصوبوں پر کام کی رفتار کو تیز کرنے اور انہیں مقررہ مدت میں مکمل کرنے کی ہدایت کی۔

منیجنگ ڈائریکٹر واسا گلشن مارکیٹ ڈی بلاک ،شاہ رکن عالم کالونی کے بلاک اور گجر پلاٹ ممتاز اباد بھی گئے۔انہوں نے ملتان شہر کے متعدد علاقوں میں صارفین کی شکایات کو فوری حل کرنے کی ہدایات جاری کرتے ہوئے کہا کہ حالیہ بارشوں اور عید قربان کے موقع پر منظم سسٹم کے تحت لوگوں کو ریلیف فراہم کیا جائے گا۔

(جاری ہے)

ایم ڈی واسا نے متعدد علاقوں میں پانی کے ضیاع اور صفائی کی ناقص صورتحال کا نوٹس لیتے ہوئے برہمی کا اظہار کیا اور فوری طور پر لیکج کی شکایت کو دور کرنے اور صفائی کی صورتحال کو بہتر کرنے کا حکم دیا۔

بعد ازاں منیجنگ ڈائریکٹر واسا نے بوسن روڈ سبزہ زار میٹرو سٹیشن کے قریب سروس روڈ پر کراؤن فیلیر کی مرمت کے کام کا بھی جائزہ لیا اور مرمت کا کام جلد از جلد مکمل کرنے اور موقع پر حفاظتی اقدامات کو یقینی بنانے کا حکم دیا۔