پاکستان اور ایشیائی ترقیاتی بینک کا کاربن مارکیٹس کو سبز ترقی کے نئے افق کے طور پر اپنانے پر اتفاق

جمعرات 29 مئی 2025 16:47

اسلام آباد (اُردو پوائنٹ اخبارتازہ ترین - این این آئی۔ 29 مئی2025ء)وفاقی وزیر برائے موسمیاتی تبدیلی و ماحولیاتی ہم آہنگی، ڈاکٹر مصدق ملک نے ایشیائی ترقیاتی بینک (اے ڈی بی) کے ایک اعلیٰ سطحی وفد سے ملاقات کی جس کی قیادت کلائمٹ چینج اینڈ سسٹین ایبل ڈیولپمنٹ کے سینئر ڈائریکٹر تورو کوبوکر رہے تھے۔ ملاقات کا مقصد کاربن مارکیٹس میں شراکتی امکانات کا جائزہ لینا اور ایک نئی ماحولیاتی حکمتِ عملی کی تشکیل کے لیے مشترکہ اقدامات کو فروغ دینا تھا، جو اقتصادی ترقی اور ماحولیاتی تحفظ کے درمیان ہم آہنگی کو ممکن بنائے۔

یہ ملاقات پاکستان کی قومی ماحولیاتی حکمتِ عملی کو بین الاقوامی معیارات اور مارکیٹ پر مبنی موسمیاتی مالیاتی حلوں کے ساتھ ہم آہنگ کرنے کی جانب ایک اہم پیش رفت ثابت ہوئی۔

(جاری ہے)

دونوں فریقین نے اس امر پر اتفاق کیا کہ ایک جامع، ہم آہنگ اور مشترکہ ماحولیاتی حکمتِ عملی مرتب کی جائے گی، جس میں کاربن کریڈٹس کا حصول، ماحولیاتی جدت طرازی، اور نتائج پر مبنی منصوبوں کا نفاذ کلیدی ستون ہوں گے۔

ڈاکٹر مصدق ملک نے اے ڈی بی کو مکمل سرکاری تعاون اور ذاتی سطح پر نگرانی کی یقین دہانی کرواتے ہوئے کہا کہ حکمتِ عملی کی تشکیل میں شفافیت، اثر انگیزی اور نتائج کی فراہمی کو ترجیح دی جائے گی۔تورو کوبو نے ترقی پذیر رکن ممالک کیلئے اے ڈی بی کے تعاون کو اجاگر کرتے ہوئے کہا کہ بینک کم کاربن ٹیکنالوجی میں سرمایہ کاری کو فروغ دیتا ہے، کاربن فنانس کے لیے آمادگی بڑھاتا ہے، اور پاکستان جیسے ممالک کو بین الاقوامی کاربن مارکیٹس تک مؤثر رسائی میں معاونت فراہم کرتا ہے۔

ملاقات میں اس بات پر بھی تبادلہ خیال کیا گیا کہ پاکستان کس طرح پائیدار ترقی کے اہداف (SDGs) کو اپنی کاربن فنانس پالیسی سے ہم آہنگ کر کے ماحولیاتی اقدامات کو اقتصادی طاقت اور عالمی وقار میں تبدیل کر سکتا ہے۔اعلامیہ کے مطابق یہ ملاقات اس اعتراف کا مظہر ہے کہ ماحولیاتی موافقت اور تخفیف صرف ماحولیاتی ضرورت نہیں بلکہ اقتصادی ترقی کے مؤثر ذرائع بھی ہیں۔