Live Updates

وزیرصحت خواجہ سلمان رفیق کا جناح ہسپتال لاہور کا دورہ ،مریضوں کی عیادت ،طبی سہولیات بارے دریافت کیا

میڈیکل ایمرجنسی، سرجیکل ایمرجنسی، ری ویمپنگ منصوبے، انجیو گرافی سوٹ و دیگر شعبہ جات کا بھی دورہ کیا

جمعرات 29 مئی 2025 17:14

وزیرصحت خواجہ سلمان رفیق کا جناح ہسپتال لاہور کا دورہ ،مریضوں کی عیادت ..

لاہور (اُردو پوائنٹ اخبارتازہ ترین - این این آئی۔ 29 مئی2025ء) صوبائی وزیر صحت خواجہ سلمان رفیق نے جناح ہسپتال لاہور کا دورہ کیا ۔مشیر صحت پنجاب ریٹائرڈ میجر جنرل ڈاکٹر اظہر محمود کیانی اور سپیشل سیکرٹری آپریشنز محکمہ سپیشلائزڈ ہیلتھ کیئر اینڈ میڈیکل ایجوکیشن طارق محمود رحمانی بھی ہمراہ تھے۔ اس موقع پر پرنسپل علامہ اقبال میڈیکل کالج پروفیسر طیبہ وسیم اور ایم ایس جناح ہسپتال ڈاکٹر سید محسن علی شاہ بھی موجود تھے۔

صوبائی وزیر اور مشیر صحت نے میڈیکل ایمرجنسی، سرجیکل ایمرجنسی، ری ویمپنگ منصوبے، انجیو گرافی سوٹ و دیگر شعبہ جات کا دورہ کیا۔صوبائی وزیر اور مشیر صحت نے تعینات ڈاکٹرز اور عملہ سے ملاقات بھی کی۔مریضوں سے عیادت کی اور طبی سہولیات بارے دریافت کیا۔

(جاری ہے)

صوبائی وزیر و مشیر صحت نے علامہ اقبال میڈیکل کالج میں ایک اہم اجلاس کی صدارت بھی کی۔

اجلاس میں تمام ایچ او ڈیز، فیکلٹی ممبران و متعلقہ افسران نے شرکت کی۔پرنسپل پروفیسر طیبہ وسیم نے جناح ہسپتال میں مریضوں کو فراہم کی جانے والی طبی سہولیات بارے صوبائی وزیر صحت کو بریفنگ دی۔صوبائی وزیر و مشیر صحت نے ری ویمپنگ منصوبے میں تاخیر پر کنٹریکٹرز پر اظہار برہمی کیا اور جلد مکمل کرنے کی ہدایت کی۔صوبائی وزیر صحت خواجہ سلمان رفیق کا اظہار خیال سرکاری ہسپتالوں میں مریضوں کو بہتر سہولیات فراہم کرنے کی کوشش کر رہے ہیں۔

جناح ہسپتال کے نیورو سرجری کے شعبہ میں مزید بہتری لائیں گے۔ وزیر اعلیٰ پنجاب مریم نواز شریف کی جانب سے شعبہ صحت کی بہتری کیلئے مکمل تعاون حاصل ہے۔ خواجہ سلمان رفیق کہ سرکاری ہسپتالوں میں ادویات کی فراہمی کو یقینی بنایا جا رہا ہے۔درخواست کرنے پر ہسپتالوں کے واجبات کی ادائیگی کیلئے وزیر اعلیٰ پنجاب مریم نواز شریف نے فوری طور پر 22 ارب روپے کی رقم کی منظوری دی۔

سرکاری ہسپتالوں میں ری ویمپنگ منصوبے کو ترجیحی بنیادوں پر مکمل کر رہے ہیں۔ بجٹ میں ادویات کی رقم کو بڑھا دیا گیا ہے۔ پرنسپل پروفیسر طیبہ وسیم نظام کی بہتری کیلئے کوشش کر رہی ہیں۔ مشیر صحت پنجاب ریٹائرڈ میجر جنرل ڈاکٹر اظہر محمود کیانی نے کہا کہ ڈاکٹرز کو ہر وقت مریض کی سہولت کی خاطر حاضر رہنا چاہئے۔ نظام صحت کی بہتری کیلئے حکومت پنجاب بنیادی اقدامات اٹھا رہی ہے۔