مانسہرہ ، عوامی مسائل کے فوری اور مؤثر حل کے لیے کھلی کچہری

مانسہرہ (اُردو پوائنٹ اخبارتازہ ترین - اے پی پی۔ 29 مئی2025ء) مانسہرہ کے علاقہ چکیاء دوراہا میں عوامی مسائل کے فوری اور مؤثر حل کے لیے کھلی کچہری کا انعقاد کیا گیا۔ کھلی کچہری میں ڈپٹی کمشنر مانسہرہ خالد اقبال اور ڈسٹرکٹ پولیس آفیسر مانسہرہ شفیع اللہ گنڈا پور نے شرکت کی۔اس موقع پر ڈسٹرکٹ ہیلتھ آفیسر ڈاکٹر شاہ فیصل خانزادہ سمیت دیگر تمام متعلقہ محکموں کے افسران بھی موجود تھے، جبکہ کھلی کچہری میں علاقہ معززین، علمائے کرام، میڈیا نمائندگان اور بڑی تعداد میں عوام نے شرکت کی۔

لوگوں نے اپنے مسائل براہ راست افسران کے سامنے پیش کیے، جنہیں موقع پر ہی بغور سنا گیا اور فوری حل کے لیے متعلقہ محکموں کو احکامات جاری کیے گئے۔ڈپٹی کمشنر مانسہرہ اور ڈی پی او مانسہرہ شفیع اللہ گنڈا پور نے اس موقع پر گفتگو کرتے ہوئے کہا کہ عوامی خدمت ہماری اولین ترجیح ہے ۔

(جاری ہے)

ضلع مانسہرہ کی ضلعی انتظامیہ اور پولیس ہر سطح پر عوام کو ریلیف فراہم کرنے کے لیے پرعزم ہے۔

انہوں نے کہا کہ عوامی مسائل کا بروقت اور شفاف انداز میں حل یقینی بنایا جائے گا اور کھلی کچہریوں کا سلسلہ مزید علاقوں تک بڑھایا جائے گا تاکہ عوام کی دہلیز پر انصاف اور سہولتیں فراہم کی جا سکیں۔ڈی پی او مانسہرہ نے کھلی کچہری میں موجود شہریوں کو یقین دہانی کرائی کہ منشیات کے خلاف موصول ہونے والی شکایات پر فوری کارروائیاں عمل میں لائی جائیں گی اور اس ناسور کے خاتمے کے لیے عوامی تعاون انتہائی ناگزیر ہے۔

انہوں نے کہا کہ اوباش نوجوانوں اور تعلیمی اداروں کے باہر لڑکیوں کو تنگ کرنے والے عناصر کے خلاف خصوصی مہم کا آغاز کیا جا چکا ہے، اور ایسے عناصر کے ساتھ کسی قسم کی رعایت نہیں برتی جائے گی۔ڈی پی او شفیع اللہ گنڈا پور نے کہا کہ علاقے سے جرائم کے خاتمے اور امن و امان کی فضا قائم رکھنے کے لیے پولیس مؤثر اور مربوط حکمت عملی پر عمل پیرا ہے، اور عوامی شراکت سے جرائم پیشہ عناصر کی حوصلہ شکنی ممکن ہے۔

افسران نے کہا کہ حکومت کی ہدایات کے مطابق عوامی مسائل کے فوری ازالہ اور ریلیف کی فراہمی کے لیے ہر ممکن اقدامات کیے جا رہے ہیں، اور عوامی تعاون سے ضلع مانسہرہ کو ایک مثالی ضلع بنایا جائے گا۔ آخر میں تمام شرکاء نے ملک و قوم کی سلامتی، خوشحالی، اور خصوصاً ضلع مانسہرہ میں دیرپا امن و امان کے لیے خصوصی دعائیں بھی کیں۔