پاکستان کا روس یوکرین میں نئی شدت سے پیدا ہونے والے تنازعے پر تشویش کا اظہار

اقوام متحدہ (اُردو پوائنٹ اخبارتازہ ترین - اے پی پی۔ 30 مئی2025ء) پاکستان نے روس اور یوکرین تنازعےمیں اضافے سے خبردار کرتے ہوئے اس مسئلے کو مذاکرات اور سفارت کاری کے ذریعے حل کرنے پر زور دیا ہے ۔ اقوام متحدہ میں پاکستان کے مستقل نمائندے عثمان جدون نے14رکنی سلامتی کونسل میں یوکرین کی صورت حال پر ایک مباحثے میں اظہار خیال کرتے ہوئے کہا کہ پاکستان کو 4 سال سے جاری تنازع کے تباہ کن انسانی اور سلامتی کے نتائج پر گہری تشویش ہے۔

انہوں نے کہاکہ دونوں ممالک میں نئی شدت سے پیدا ہونے والے تنازعے نے تمام مذاکرات اور کی جانے والی سفارتی کوششوں پر پردہ ڈال دیا ہے ۔ انہوں نے اقوام متحدہ کی سلامتی کونسل کو خبردار کرتے ہوئے کہا کہ تنازع کا کوئی فوجی حل نہیں ہے اور ہم دشمنی کی شدت میں اضافے کی حالیہ رپورٹس سے گھبرا گئے ہیں۔

(جاری ہے)

انہوں نے بتایا کہ تنازعہ میں نئی ​​شدت پیدا ہونے کے باعث عام شہریوں ، شہری بنیادی ڈھانچے پر بڑھتے ہوئے حملوں میں اضافہ ہوا ہے ۔

اس سلسلے میں سفیر جدون نے شہریوں اور شہری انفراسٹرکچر کے تحفظ کی ضرورت کو واضع کیا۔ اس بات پر زور دیتے ہوئے کہ فوجی ذرائع سے اس تنازعے کو حل نہیں کیا جا سکتا، اور سفارتی کوششوں سے رکھی گئی امن کی اس نازک بنیاد کو مضبوط کرنے کی ضرورت ہے، پاکستانی مندوب نے کہاکہ ہم روسی فیڈریشن اور یوکرین کے درمیان براہ راست مذاکرات کا خیرمقدم کرتے ہیں۔

انہوں نے ترکیہ کے شہر استنبول میں روس کی جانب سے براہ راست مذاکرات کے دوسرے دور کے انعقاد کی پیشکش کو نوٹ کرتے ہوئے کہا کہ فریقین کو پائیدار جنگ بندی کے حصول کے لیے موجودہ فریم ورکس پر استوار کرتے ہوئے بات چیت کے لیے اپنی وابستگی کو دوگنا کرنا چاہیے۔انہوں نے بتایا کہ پاکستان نے روس یوکرین تنازعہ کے آغاز سے ہی مزید جانی نقصان کو روکنے کے لیے فوری طور پر کشیدگی میں کمی کی وکالت کی تھی اور فریقین پر زور دیا کہ وہ بامعنی مذاکرات کی پیروی کریں، باہمی سلامتی کے خدشات کو حل کرنے کے لیے اقوام متحدہ کے چارٹر کے فریم ورک کے پیش نظر ایک منصفانہ اور دیرپا امن کی راہ ہموار کرنے کے لیے اہم علاقائی اور بین الاقوامی اسٹیک ہولڈرز کو شامل کرتے ہوئے، سفارت کاری کی حمایت کریں۔

انہوں نے کہاکہ پاکستان اقوام متحدہ کے چارٹر، بین الاقوامی قانون، متعلقہ کثیرالطرفہ معاہدوں کے اصولوں پر مبنی پرامن قرارداد کی جانب تمام کوششوں کی حمایت کے لیے تیار ہے، اور جو تمام فریقین کے جائز قومی سلامتی کے مفادات کو پورا کرتا ہے۔