سعودی عرب،غیر ملکی کارکنان کی اجتماعی رہائش کے لئے نئے ضوابط جاری

جمعرات 24 جولائی 2025 16:46

ریاض(اُردو پوائنٹ اخبارتازہ ترین - این این آئی۔ 24 جولائی2025ء)سعودی وزارتِ بلدیات وہائوسنگ نیغیر ملکی کارکنوں کی اجتماعی رہائش کے لئے نئے ضوابط جاری کردیئے۔ وزارت بلدیات نے کہا ہے کہ کارکنوں کی سلامتی کے امور کو مدنظر رکھتے ہوئے ان کے لیے معیاری رہائش کی فراہمی کو یقینی بنانے کے لیے ضوابط متعین کیے ہیں ۔ ضوابط کے مطابق کمرے میں 10 افراد سے زیادہ نہ ہوں جبکہ فی فرد چار میٹرمربع سے کم جگہ نہ ہو۔

ضوابط کے مطابق رہائشی کمپاونڈز یا عمارت سنسان مقامات پرنہ ہو، ورکشاپس، گودام یا صنعتی علاقے سے فاصلے پر ہوں۔کارکنوں کی رہائشی عمارت سکول اور ہسپتال سے 300 میٹر کے فاصلے پر ہو۔ ایسے کمپاونڈ جہاں 500 کارکنوں کی رہائش کا انتظام ہو وہاں بھی کمروں میں فی فرد 4 مربع میٹر سے کم جگہ نہ ہو۔

(جاری ہے)

ہر 8 افراد کے لیے ایک باتھ روم جبکہ ہر منزل پر 2 کچن ہوں۔

علاوہ ازیں کامن روم کے علاوہ کپڑے دھونے کے لیے جگہ مخصوص ہو۔ رہائش میں سیوریج کا مناسب انتظام کیا جائے۔سردی اور گرمی سے بچانے کیلیے ہیٹر اور ایئرکنڈیشنگ ضروری ہے۔ کارکنوں کو پینے کا صاف پانی فراہم کرنا ضروری ہے۔ عمارت یا کمپاونڈ کی مستقل بنیادوں پر صفائی کا اہتمام کیا جائے۔ ایک ہزار سے پانچ ہزار کارکنوں کے لیے بنائے گئے لیبرکیمپس یا کمپاونڈ میں سعودی نگران کو تعینات کیا جائے جبکہ ہنگامی طبی امداد کیلیے ایمرجنسی روم اور کلینک جہاں طبی ضروری اشیا کے علاوہ لائسنس یافتہ نرس اور ایک ڈاکٹر کی موجودگی ضروری ہے۔