پنجاب فوڈ اتھارٹی فیصل آباد کا کھرڑیانوالہ میں غیر قانونی سلاٹر ہاس پر چھاپہ ،مالک گرفتار

جمعہ 30 مئی 2025 14:25

مکوآنہ(اُردو پوائنٹ اخبارتازہ ترین - این این آئی۔ 30 مئی2025ء)پنجاب فوڈ اتھارٹی فیصل آباد نے کھرڑیانوالہ میں غیر قانونی سلاٹر ہاس پر چھاپہ مارکر 160کلو بیمار جانور کا گوشت برآمد کرکے تلف کردیا اور جعلسازی کا مکروہ کاروبار کرنے پر مالک کو گرفتارکرلیا ۔

(جاری ہے)

ترجمان فوڈ اتھارٹی فیصل آباد نے بتایا کہ غیر قانونی مذبحہ خانہ میں صفائی کے ناقص انتظامات جبکہ انتہائی لازم ریکارڈ عدم موجود پایا گیا، موقع پر ویٹرنری سپیشلسٹ ٹیم نے گوشت کا مکمل معائنہ کرنے کے بعد گوشت کو مضر صحت قرار دیا جس پرغیر قانونی سلاٹر ہاس کے مالک کے خلاف مقدمہ درج کروا کراسے گرفتار کروا دیا گیا۔

انہوں نے بتایا کہ غیر معیاری مضر صحت گوشت کی سپلائی روکنے کے لیے نئے قوانین لا رہے ہیں۔انہوں نے کہاکہ مردہ و بیمار جانورکا گوشت اور خوراک میں اس کا استعمال معدہ اور جگر کے موذی امراض میں مبتلا کرتا ہے۔انہوں نے کہاکہ جعل ساز مافیا زیادہ منافع کی لالچ میں خوراک نہیں بیماری فروخت کرتا ہے۔انہوں نے کہا کہ پنجاب فوڈ اتھارٹی کی ٹیمیں معیاری خوراک کی یقینی فراہمی کے لیے مسلسل چیکنگ جاری رکھے ہوئے ہیں۔انہوں نے کہاکہ صحت دشمن عناصر کسی رعایت کے مستحق نہیں لہذا ان کے خلاف سخت کارروائی عمل میں لائی جائے گی۔