پشاور، نواحی علاقہ ارمڑ میں 6 افراد کے سفاکانہ قتل میں ملوث مرکزی ملزمان گرفتار

جمعہ 30 مئی 2025 16:04

پشاور (اُردو پوائنٹ اخبارتازہ ترین - اے پی پی۔ 30 مئی2025ء) سی سی پی او پشاور قاسم علی خان کی خصوصی ہدایت پر ایس ایس پی آپریشنز مسعود احمد اور ایس ایس پی انوسٹی گیشن نور جمال کی نگرانی میں ایس پی صدر ڈویژن رضا محمد خان، ڈی ایس پی رحمان بابا سرکل دیار خان، ڈی ایس پی انوسٹی گیشن بحت منیر خان، ایس ایچ او تھانہ ارمڑ نور محمد خان اور تفتیشی عملہ پر مشتمل خصوصی ٹیم نے جدید سائنسی خطوط پر دن رات انتھک محنت کے دوران 6 افراد کے قتل میں ملوث ملزمان کو گرفتارکر لیا۔

ترجمان پولیس کے مطابق 19 مئی 2025 کو علاقہ تھانہ ارمڑ، ارمڑ بالا میں 6 افراد مسماہ (ش) زوجہ اطلس بعمر 60/62 سال، مسماہ (ن) زوجہ رمضان بعمر26/27 سال، حضرت امین ولد اطلس بعمر 24/25 سال، فضل امین ولد اطلس 21/22 سال، طفلکہ ہما دختر فضل امین بعمر 10 سال، طفل احمد ولد فضل امین بعمر 3 سال بے دردی سے قتل کا افسوس ناک واقعہ پیش آیا تھا اس ضمن میں مدعی نسیم ولد اطلس خان کی مدعیت میں مقدمہ درج کیا تھا۔

(جاری ہے)

واقعہ کا سی سی پی او پشاور قاسم علی خان نے سختی سے نوٹس لیتے ملوث ملزمان کا سراغ لگانے اور ان کی گرفتاری کیلئے ایس ایس پی آپریشنز مسعود احمد، ایس ایس پی انوسٹی پی انوسٹی گیشن نور جمال کی سربراہی میں ایس پی صدر ڈویژن، ڈی ایس پی رحمان بابا سرکل، ڈی ایس پی انوسٹی گیشن، ایس ایچ او تھانہ ارمڑ اور تفتیشی افسر پر مشتمل خصوصی ٹیمیں تشکیل دے دی گئی۔ خصوصی ٹیم نے جدید سائنسی خطوط پر تفتیش کے دوران 6 افراد قتل میں ملوث مرکزی سفاک ملزمان شمشاد اور منصور پسران دلشاد ساکنان ارمڑ بالا کو گرفتارکر لیا، گرفتار ملزمان سے مزید تفتیش جاری ہے۔