Live Updates

نائب وزیراعظم اور وزیر خارجہ سینیٹر محمد اسحاق ڈار کا کابل میں پاکستان کے ناظم الامور کو سفیر کی سطح تک اپ گریڈ کرنے کے فیصلے کا اعلان

جمعہ 30 مئی 2025 19:27

اسلام آباد (اُردو پوائنٹ اخبارتازہ ترین - اے پی پی۔ 30 مئی2025ء) نائب وزیراعظم اور وزیر خارجہ سینیٹر محمد اسحاق ڈار نے کابل میں پاکستان کے ناظم الامور کو سفیر کی سطح تک اپ گریڈ کرنے کے فیصلے کا اعلان کیا ہے۔ جمعہ کو ایکس پر اپنی ایک پوسٹ پر نائب وزیراعظم نے کہا کہ اس سال 19 اپریل کو پاکستانی وفد کے ساتھ کابل کے میرے انتہائی نتیجہ خیز دورے کے بعد پاکستان اور افغانستان کے تعلقات مثبت سمت میں آگے بڑھ رہے ہیں۔

(جاری ہے)

انہوں نے کہا کہ اس رفتار کو برقرار رکھنے کے لیے مجھے حکومت پاکستان کے کابل میں اپنے چارج ڈی افیئرز کی سطح کو سفیر کی سطح تک اپ گریڈ کرنے کے فیصلے کا اعلان کرتے ہوئے خوشی ہو رہی ہے۔ نائب وزیراعظم اور وزیر خارجہ سینیٹر محمد اسحاق ڈار نے اس یقین کا اظہار کیا کہ یہ قدم باہمی روابط میں مزید اضافہ کرے گا، اقتصادی، سکیورٹی، سی ٹی اور تجارتی شعبوں میں پاک افغان تعاون کو مزید گہرا کرے گا اور دونوں برادر ممالک کے درمیان مزید تبادلوں کو فروغ دے گا۔\932