سعودی عرب نے پاکستان سمیت 14 ممالک کیلیے "ورک ویزا" معطل کر دیئے

ریاض (اُردو پوائنٹ اخبارتازہ ترین۔ 30 مئی2025ء) سعودی عرب نے پاکستان سمیت 14 ممالک کیلیے "ورک ویزا" معطل کر دیئے ، پابندی کا سامنا کرنے والے زیادہ تر اسلامی ممالک ہیں۔ تفصیلات کے مطابق حج بیت اللہ 1446 ہجری کے دن قریب آنے پر سعودی عرب کی حکومت کی جانب سے اہم ترین فیصلے کا اعلان کیا گیا ہے۔ سعودی حکومت نے پاکستان سمیت 14 ممالک کے شہریوں کیلئے ورک ویزوں کا اجراء معطل کر دیا ہے۔

ذرائع کے مطابق یہ پابندی عارضی ہے جو حج کے ایام کی وجہ سے عائد کیے گئی ہے۔ سعودی عرب نے پاکستان سمیت 14 ممالک کے شہریوں کے لیے ورک ویزوں کا اجرا جون 2025 تک کے لیے معطل کر دیا ہے۔ پاکستان کے علاوہ بھارت، مصر، بنگلہ دیش، انڈونیشیا، عراق، نائیجیریا سمیت دیگر ممالک پر بھی اس پابندی کا اطلاق کیا گیا ہے۔

(جاری ہے)

سعودی حکام کے مطابق ورک ویزوں پر پابندی کا یہ یہ فیصلہ حج سیزن سے قبل امیگریشن کنٹرول، رش کی روک تھام اور غیر قانونی حج کو روکنے کے مقصد سے کیا گیا ہے۔

سعودی وزارتِ افرادی قوت کے مطابق جن ممالک کے لیے بلاک ورک ویزے بند کیے گئے ہیں ان میں پاکستان، بھارت، بنگلہ دیش، مصر، انڈونیشیا، عراق، نائیجیریا، اردن، الجزائر، سوڈان، ایتھوپیا، تیونس، یمن، مراکش شامل ہیں۔ مزید بتایا گیا ہے کہ سعودی حکومت کی جانب سے جن "بلاک ورک ویزا" کے اجراء پر عارضی پابندی عائد کی گئی ہے، یہ دراصل ویزوں کا ایک ایسا کوٹہ ہوتا ہے جو سعودی کمپنیاں پہلے سے منظور کروا کر مخصوص ممالک سے ورکرز منگوا سکتی ہیں۔

تاہم اب سعودی حکومت کی جانب سے پابندی عائد کر دیے جانے کے بعد نئی درخواستیں قبول نہیں کی جائیں گی۔ پرانی درخواستوں کا فیصلہ بھی تاخیر سے کیے جانے کا امکان ظاہر کیا گیا ہے۔ مزید بتایا گیا ہے کہ جن غیر ملکیوں کو ورک ویزوں کا پہلے سے اجراء ہو چکا تاہم وہ اب تک سعودی عرب میں داخل نہیں ہوئے، پابندی کے ایام میں انہیں بھی سعودی عرب میں داخلے ہوتے وقت مشکلات کا سامنا کرنا پڑ سکتا ہے۔

مزید بتایا گیا ہے کہ ورک ویزوں کے ساتھ ساتھ سعودی عرب نے عمرہ، فیملی وزٹ، بزنس، اور ٹورسٹ ویزے بھی کئی ممالک کے لیے عارضی طور پر روک دیے ہیں۔ یہ پابندیاں جون 2025 کے اختتام تک جاری رہیں گی۔ ان پابندیوں کے خاتمے یا ان میں توسیع سے متعلق جون 2025 کے اختتام پر فیصلہ کیا جائے گا۔